تونسہ شریف: بلوچ یکجہتی کمیٹی ہنوکا تُوو مروکا تُربَت آن اسلام آباد لانگ مارچ نا تونسہ بننگ آ برانز و بخیرٹ کروکا تہ ایف آئی آر کننگاسس ، ہموفتے آن اِرا بندغ آ ایف آئی آر مسس ہرافتا ضمانت ہم مسُونے ہموفتے پولیس دزگیر کننگ آن پد بیگواہ کرے ۔
ہندی حوال آتا رد ئٹ اسلم بزدار و رسول بخش بزدارئے اینو سُہب ئنا پنجاب پولیس اُرا آن دزگیر کرسا تینتون درے ۔ دزگیری تے ہموخت کننگاسس ہراوخت بلوچ یکجہتی کمیٹی نا سلسلہ وار برانز آ تا رد ئٹ اینو تونسہ ٹی برانز مروئیءِ ۔
بلوچ یکجہتی کمیٹی نا پاننگ ءِ کہ ریاست ایف آ ئی آر و دزگیری تیان تونسہ ٹی مروکا اینو نا برانز ئے ختم کننگ خوائک ولے نن ظلم ئنا برخلاف بڑز مروکا دا جہد و توار ئے دزگیری نا ذریعہ ئٹ چُپ کریفنگ مفک ۔
بی وائے سی نا رد ئٹ پنجاب پولیس نا نیمہ آن تونسہ ئٹی سیاسی باسک آ تے دزگیر کننگ ءُ و اُرا تیٹ چھاپہ خلنگءُ و فون کالز آ تا ذریعہ ئٹ اوفتے تنگ کیرا اینو نا برانزئے بے سُہب کننگ نا کوشست برجاء ءِ ۔
درشان ئٹی غیرت مند انگا بلوچ راج آن خواست کننگا کہ تینا اُرا تیان پیشتمر و مروکا ظلم ئنا برخلاف جدوجہد نا کسر ئے ہرفر۔ اینو کلمہ چوک آ یک بج آ مروکا برانز ئٹی اواری ئے یخینی جوڑ کیر و اسہ بھلو عوامی طاقت ئسینا پیغام ئے تیر ۔
