سردار اختر جان مینگل مستونگ ئٹ تولوک برانز آن پڑو کرے کہ نن شش اپریل آ سہب ئنا نُہہ بجہ غا شال آ رادہ مرون۔
او پارے کہ حکومت دا گیاوان ئٹ ننا ہیت ئے بِننگ اف، داسا شال ئنا پِڑ آ ہیت مرو۔
خیال ئٹ مرے کہ سردار اختر مینگل نا کماشی ٹی بلوچ یکجہتی کمیٹی نا راہشون ڈاکٹر ماہ رنگ و ایلوفتا دزگیری نا برخلاف 28 مارچ آ وڈھ آن شال اسکان اسہ لانگ مارچ ئس اڈ تننگا ہرادے جتا جاگہ غا تیا ہڑاند آتون مون تروئی تما۔
ہراتم لانگ مارچ مستونگ ئے سر مس تو حکومت اودے شال ئٹ پیہنگ التو و اونا کسر ئے لکپاس ٹنل، کنڈ مسوری، اغبرگ و ایلو اہم انگا جہہ تیان بند کننگا ہرا نا سوب آن اختر مینگل مستونگ ئٹ تولوک برانز بناء کرے۔
دا نیامٹ حکومت و برانزی تا نیامٹ گپ تران مس ولے بیدس بھرم آن دا گپ تران ایسر مس۔ اختر مینگل نا پاننگ اس کہ گپ تران کن بروک کمیٹی بے اختیار ءِ۔
