مستونگ کوہ چلتن نا دامان ئٹ تولوک برانز جہہ آ تران کرسا سردار اختر مینگل پارے کہ ببو قول کین کہ ہراتم اسکان نن تینا بندی آ زالبول تِہ اُرا تے اسکان سر کتنون ننے آ ننا ُاراک حرام ءُ۔ درو سرکار تینا چُنکا تتلی آن بارنگا ڈرون ئنا ذریعت ئٹ بس ننا جنسار تِہ کشا و پارے ہُبو داڑے بندغ آک اخس مچِٹ ءُ، اینو ای اوفتِہ پاوہ کہ اینو ببو تینا بھلا تتلی (ہیلی کاپٹر ) ئٹ ہُبو کہ داڑے اخس بندغ تولوک برانز ئٹ اوار ءِ۔
سردار اختر مینگل پارے کہ اینو چلتن نا مَش ئے ہُبو کہ دا تینا ڈغار نا نیاڑی تا دزگیری آ اخس ہوغنگ ءِ ایلو کنڈ آن دا چلتن تینا بھاتی تا بیوسی آ ہوغنگ ءِ۔
سردار اختر مینگل پارے کہ وڈھ ئٹی اسہ خَت ئنا رخت ئس ارے ہرادے ” خان ئنا خت” پارہ ہراڑے نصیر خان اسہ وار جرگہ ئس کرے ہراڑے کماش (سردار عطااللہ مینگل) وصیت کرے کہ کنے انداڑے گُڈی ہند کیرے، یات مرے نُمے کہ ہراڑے اینو نن تولوک برانز کننگ اُن و اینو نن داڑے ائید نماز خوانان دا عمل دیہاڑ ئٹ لکھنگو و ہرکس کہ داڑے اوار مس و نماز خوانا اوفتا پِن ہم دیہاڑ ئٹ لکھنگو۔
سردار اختر مینگل ایسر ئٹ برانزی تا دو تِہ بُڑز کرفِسہ سوغند تس کہ تولوک برانز ہموتم اسکان برجاء مرو ایسکان کہ ننا نیاڑیک آجو متنو۔ دا وختا نعرہ ہم خلنگا۔
او حکومت ئے اِرا دے ئنا وخت ترسا پارے کہ اگہ اِرا دے ئٹی نیاڑیک آجو متور گُڑا مسٹمیکو دے نن شال ئنا پارہ غا لانگ مارچ کرون۔
