کوئٹہ بلوچ یکجہتی کمیٹی نا راہشون ڈاکٹر ماہ رنگ بلوچ ہرا دا وختا 3 ایم پی او نا رد ئٹ جیل ئٹ بند ءِ، جیل آن تینا ایڑ ایلم تیکن اسہ چھٹی ئس لکھانے۔
اونا ایڑ نادیہ بلوچ، دا چھٹی ئے سوشل میڈیا غا تسنے ہراٹی ماہ رنگ بلوچ تینا خاہوت و بلوچ الس ئنا پنا اسہ کلہو ئس تسنے۔
چھٹی ٹی ماہ رنگ بلوچ لکھانے:
کنا عزیز آ ایڑک و کنا اسٹ انگا ایلم ناصر جان، کنے احساس ارے کہ ای نُمے اسہ وار ولدا سختو وخت ئسیٹ شاغانُٹ 2011 آن ہلیس اینو اسکان نن کیہی چکاس (آزمائش) آتون مون تسوسس ولے دا ہر بلوچ نا اُرا نا کسہ ءِ، اگہ وختس نُم نزور مسرے گُڑا تینا دامون ہیمون ہُرِرے۔
ای ساندہ کوشست کرینُٹ کہ ذمہ واری تا باریم نُما زیہا بف ولے بلوچستان ئٹی رہینگِسہ دُن منکن الو بلکہ داکان ہم زیات گندہ مننگ کیک اندا سوب آن تینے ذہنی حوالہ ئٹ تیار کر۔
ہراتم ای جیل ئٹ نے اولیکو وار خناٹ تو ای اولیکو وار تینے نے ٹی خناٹ، ہمو بےجاراتی، ہمو اضطراب، ہمو ہرا گِڑا ئے سہی کننگ نا جہد، دتر نا سیالی اندن مریک ولے نن انت کننگ کینہ، دا ننا بخت ئٹ لکھوک ءِ دا ہر بلوچ نا بخت ءِ۔
ای جیل آن دا چھٹی ئے اندا سوب آن نے کن لکھنگ اُٹ انتئے کہ جیل ئٹ اوڑدئی نا وختا ای نیتو بھاز ہیت کننگ خواہسوٹہ ولے کننگ کتوٹ۔
ای دائسکان دا گڑا ئے ہیل کتنوٹ کہ جیل ئنا سلاخ آتا پد آن تینا ایڑ ایلم تتون امر ہیت کننگ مریک، ای نے حوصلہ تننگ خواہسوٹہ ولے لوز الو کنتو، داسا ہمت مُچ کننگ اُٹ و وخت تون اوار نے ہم اندا ہمت رسینگو ہمر کہ نن ہمو وختا ہمت کرین ہراتم ننا باوہ ئے شہید کننگا۔
ای ساندہ اندا خواہسونُٹ کہ نن چھوری مننگ آن پد ہم خوشحالو زند ئس تیر کین، ہچ وختس ہم پولیس یا زندان تتون مون تروئی تمپ ولے نن انت کننگ کینہ؟ جہد ئٹ زند ئنا خرینا گواچن اندادے، بلوچستان ئٹ نن تینا مرضی نا زند کننگ کپنہ دا کسر ساندہ سخت اس و بھازی آن داکان ہم زیات سخت مرے ولے ارزان اسُل مروف۔
ننا باوہ تینے بلوچ نا حق کن تینے گؤندنگ نا فیصلہ کرے و اوڑان پد نن غُٹ اونا نظریہ ئے تینائی کرین و دا جہد ئے برجاء تخان داسا دا سخت انگا وخت ئٹ نے اسہ ایلو نا خیال ئے تخوئی ءِ و اسٹ ایلو نا سہارا جوڑ مروئی ءِ۔
یات تخرے کہ اسل تاغت بدن نا آخہ بلکہ ذہن و نظریات نا مریک تینے ذہنی و نظریاتی وڑ ئٹ سوگو تخبو و اسُل تینے پِننگ کن الپیرے، نُما ایڑ نزور اف، نزوری ننا ورثہ اف۔
دا وخت ءِ سوگو سلینگ نا، تینا عزم آ سلینگ نا و تینا بلوچ ایڑ ایلم تتون اوار سلینگ نا۔
اللہ نُمے کُل ئے رکھے، اللہ بلوچستان ئے رکھے، کنے سما اف اینو اَرا دے ءِ و ائید اَراتم ءِ ولے نُمے و کنا قوم ئے مہالو آن ائید مبارک۔
مہرنگ بلوچ
(جیل آن لکھوکا چھٹی، پنچ شمبے، 27 مارچ)
