صوبائی حکومت نا مذاکراتی ڈل لکپاس آ برجاء بلوچستان نیشنل پارٹی نا تولوک برانز آ بس، گپ تران صوبائی وزیر پی این ڈی پی ظہور بلیدی، صوبائی وزیر جانجوڑی بخت محمد کاکڑ، پیپلز پارٹی نا سروک نور احمد بنگلزئی، بلوچستان نیشنل پارٹی نا سروک اختر مینگل، نواب محمد خان شاہوانی، اختر حسین لانگو، ثناء اللہ بلوچ، پرنس آغا موسی جان و ایلو بنجاہی سروک آتا نیامٹ مس۔
حکومتی ڈل برانز نا سروک آتیان خواست کرے کہ داسا نا حالیت ئے ہُرسا و ائید ئنا خُڑکی نا سوب آن برانز ئے ایسر کیر، الس ئے فریشانی تون مون تروئی تمنگ ءِ۔
ڈل دعویٰ کرے کہ صوبائی حکومت ویل آتِہ تولِسہ ہیت ئٹ ایسر کرو، گپ تران نا اولیکو دور ہُرے اسکان برجاء سلیس۔
بی این پی نا پارٹی سروک آک ماہ رنگ بلوچ، سمی دین، بیبو تون اوار ایلو زالبول آتا آجوئی نا خواست آ سلوک اسُر۔
گپ تران نا اولیکو بشخ ہچو بھرم آن بیدس ایسر مس، و صوبائی حکومت نا مزاکراتی ڈل دوارہ کوئٹہ غا رادہ مس۔
حکومتی ڈل با ملنگ آن پد دوارہ گپ تران کن بی این پی نا راہشون تیتون برو تولو و گپ تران ئٹ دیمروی نا کوشست کرو۔
