بلوچستان نیشنل پارٹی نا بنجائی سروک آک میڈیا ئے حوال تسنو کہ لکپاس ٹنل آ پارٹی سروک و باسک آتیا پاکستانی لشکر نا کنڈ آن سمکاری کننگانے، 250 آن زیات باسک آتِہ دزگیر کننگانے۔ واہم علاقہ ٹی انٹرنیٹ بند مننگ و تہارمئی نا سوب آن حالیت نا جوانیکا سما تمنگ اف۔
دا رد ئٹ بی این پی میڈیا سیل نا کنڈ آن سردار اختر نا بیان ئس شنگ کننگانے ہراٹی او پارینے کہ نن بھاز فریشانی، ڈکھ و خار ئٹ دا ہیت ئے پک کینہ کہ لکپاس ٹنل آ بلوچستان نیشنل پارٹی نا سروک و باسک آتیا پاکستانی لشکر سمکاری کرسا ننا 250 آن زیات باسک بیدس جواز دزگیر کرینو۔ دا ریاستی زوراکی پُرامن و آئینی برانز آتِہ لتاڑنگ نا اسہ گندہ ءُ کوشست ئس ءِ۔
او پارے کہ نن پھاش پانہ کہ ننا تحریک تیبہ پر پُرامن ءِ، و ننا خواست آک جائز و بندغی بنداو آتیاٹ ءُ۔ ننا بنداوی خواست ءِ کہ ننا لمّہ ایڑ تِہ دمدستی آجو کننگِہ ہرافتِہ بےقانودی دزگیر کننگانے۔ اوفتا آجوئی آن بیدس ہچو مذاکرات، ہچو باور تننگ ئس و ہچو قول ئس نن منیپنہ۔
اونا ودیک پاننگ اس کہ باسک آتیا جلہو، دزگیری و ریاستی تاغت ننا توار ئے توننگ کپک۔ نن دنیا ئے کلہو تننگ خواہنہ کہ بلوچ قوم ظلم ئنا مونا کاٹم شیف کروف۔ ننا سیوتی، عزم و ننا قربانیک دا جہد ئے اونا مزل اسکان الم سر کرور۔
سردار اختر پارے کہ نن خواست کینہ کہ غُٹ دزگیر کننگوک بندغ آتِہ آجو کننگِہ و ننا جائز خواست آتِہ پورو کننگِہ نہ تو حالیت آتا ودیک خرابی نا ذمہ وار ریاستی ادارہ غا تیا مرو۔ بی این پی نا کنڈ آن اسہ پین بیان ئسیٹ پاننگا مُستی لائحہ عمل نا پڑو پگہ سہب ئنا کننگو۔
خیال ئٹ مرے کہ بلوچستان نیشنل پارٹی نا لانگ مارچ وڈھ آن پیشتمِسہ خضدار، کلات و مستونگ نا کسر ئٹ شال آ ہِننگ ءِ و دا وختا کسر آ اوفتیکن بھاز جاگہ غا ہڑاند ودی کننگانے۔
سردار اختر داکان مُست تینا تران ئٹ پاریسس کہ ننے حوال رسینگانے کہ شال ئٹ تیبہ لاک ڈاؤن ءِ و لک پاس نا ہڑتوم پارہ غان کنٹینر تخِسہ کسر ئے بند کننگانے۔ ای بلوچستان نا دلیر آ الس آن خواست کیوہ کہ او ہڑتوم پارہ غان لک پاس آ مُچ مریر و دنیا ئے بلوچ قوم ئنا سیوتی و تاغت ئے نشان ایتر۔
او پارے کہ لانگ مارچ ئٹ اوار بندغ آتیان کنا خواست ءِ کہ او ہر دروشم ئٹ پُرامن مریر، چاہے ننے ہخس خار تننگ نا کوشست کننگ مرے۔ ننا تاغت ننا نظم و ضبط، ننا سیوتی و ننا مسخت ئٹ ءِ۔
بلوچستان نیشنل پارٹی نا سروک سردار اختر جان مینگل پڑو تس کہ لانگ مارچ ئنا گُڈیکو مزل ریلوے ہاکی چوک مرو ہراڑے برانزیک تینا آئینی و جمہوری حق آتیکن تولوک برانز کرور۔ او پارے کہ اگہ ننا خواست آک پورو متور گُڑا نن ائید ئنا نماز ہم ہاکی چوک آ خوانون۔
