بلوچ یکجہتی کمیٹی نا راہشون ڈاکٹر ماہ رنگ بلوچ نا ایڑ نادیہ بلوچ تینا شنگ کروک بیان ئٹ پارینے کہ نن تینا لمّہ تون اوار جیل آ ہنان تاکہ ڈاکٹر ماہ رنگ بلوچ ئے خنِن۔ ننے 8 گھنٹے انتظار کرفیر، اوکان پد بیرہ فون آ شیشہ نا دیوال آتا ذریعت ئٹ ہیت کننگ نا موکل تسر۔
او پارے کہ جیل اسٹاف ئے تیبہ مَٹ کننگ مننگ ءِ، او انٹیلی جنس ایجنسی تا سخت نگرانی ٹی ءِ۔ اوڑدئی کن اسہ یکہ ءُ کوٹی ئس جوڑ کننگ مننگ ءِ ہراٹی کیمرہ و مائیکروفون خلنگ مننگ ءِ۔
خاہوت پارے کہ ہائی کورٹ نا حکم آن بیدس ہم ننے ماہ رنگ تون ذاتی ملاقات نا موکل تننگ افس، ہراڑان اونا بنداوی بندغی حق آتا پھاش لتاڑ مننگ ءِ۔
او پارے کہ ماہ رنگ بھاز ناجوڑ ءِ و مُسہ دے آن اِرغ دیر کُننگ آن پد اونا تب خراب ءِ۔ نن وار وار آ خواست کننگ اُن کہ اسہ ڈاکٹر ئسے اونا جانجوڑی کن موکل تننگِہ ولے دائسکان ہچو جوانو ڈاکٹر ئس اونا ہُننگ کن بتنے۔ درو اسہ جونیئر ڈاکٹر ئس اودے زرس ہُرا ولے داخس کافی اف۔ نن خواست کینہ کہ اسہ آزاد جانجوڑی بورڈ ئس دمدستی اونا ہُننگ کن برے۔ اونا صحت بھاز خراب مسنے و ننے خُلیس ءِ کہ اونا حالیت بھاز خراب ءِ۔
نادیہ بلوچ پارے کہ ای میڈیا، سول سوسائٹی و قانودی کمیونٹی آن خواست کیوہ کہ او دمدستی کاروائی کیر تاکہ کورٹ ئنا حکم آ عمل کننگِہ و ماہ رنگ ئے دمدستی جانجوڑی کمک و انصاف رسینگِہ۔
