بلوچ راہشون ڈاکٹر ماہ رنگ بلوچ نا ایڑ چاگڑدی حوالکاری میڈیا غا پوسٹ کرسا پاریننے کہ ای تینا ایڑ ئکن فریشان اُٹ۔ او جیل ئٹ بھاز نفسیاتی دباؤ ٹی ءِ، اونا تب ہم ناگمان آ بھاز خراب مسنے، او تدوکا کیہی دے آن ناجوڑ ءِ و اودے جیل ئٹ جانجوڑی کمک تننگ افس۔
نادیہ بلوچ نا رد ئٹ درے نن او بھاز ناجوڑ مس و وار وار آ اُلٹی کننگ آن اونا حالیت خراب مس۔ اینو سہب ئنا ڈاکٹر ئس خواہفنگ مس، ولے جانجوڑی کمک ئٹ ہُرے کننگ ناقابل قبول ءِ۔ کنے خُلیس ءِ کہ اودے ہامدیکا دننگا حالیت ئٹ تخنگ مننگ ءِ ہراڑان اونا تب خراب مننگ ءِ، و کنے دا گڑا نا ہم بھاز خُلیس ءِ کہ اونا اِرغ آک زہر آلود مننگ کیرہ۔
او پارے کہ اینو سہب ئنا اوڑتون مِلنگ کن جیل آ ہناٹ۔ کنا ایڑ اقراء ئے اودے خننگ کن التور۔ ای اوڑتون بیرہ منَہ منٹ کن مِلیوہ۔ او بھاز نزور و ناجوڑ و نازرک خننگک۔
داکان بیدس، ماہ رنگ نگرانی نا کیمرہ، نامناسب بیرُم، خوراک نا نیستی و تینا سیاسی قیدی مننگ نا حق آتا رسینگپرنگ نا غاو کرے۔
او پارے کہ دا سختی تیان پد ہم ڈاکٹر ماہ رنگ تینے سوگو تخک ولے او ناجوڑ ءِ و ننے اونا ساہ ئنا خُلیس ءِ۔ کوئٹہ ٹی اینو انٹرنیٹ سروس ہم بند کننگا تاکہ نن اوڑکن توار بُڑز کننگ گپن۔
نادیہ بلوچ الس و بندغی حق آتا ادارہ غا تیان خواست کرے کہ نُم ڈاکٹر ماہ رنگ بلوچ و و ایلو دزگیر کننگوک بلوچ بندی تیکن توار بُڑز کبو۔
