حوال تا رد ئٹ پاکستانی لشکر آ بلوچستان نا جتا علاقہ آتیٹ سخت جلہو کننگانے و سلاہ بند بندغ آک کسر تِہ تفِسہ پٹ ئہ پول کننگ ءُ۔
کیچ ئنا ہند دشت و مند ئٹی پاکستانی لشکر نا کیمپ آتا سلاہ بند بندغ آک جلہو کریر۔ جلہو نا وخت سخت سُمکاری و تراک آتا توار بننگانے۔
انُدن نوشکی ٹی شیخ واصل نا جہہ کوئٹہ تفتان بھلا کسر آ بلوچ سرمچارک کسر تِہ تفینو، ہراڑے سلاہ بند بندغ آتا سلاہ تِہ ہم پُھلانو۔
بولان نا جتا ہند آتیٹ سلاہ بند بندغ آک کسر تِہ تفینو، اندُن سول پُچ آتیٹی بندغ آک خننگ مسنو ہرافتا بابت ئٹ ہندن حوال ءِ کہ پاکستانی لشکری کارندہ غاک ءُ۔
قلات شار ئنا خُڑک آ بھلا کسر آ سلاہ بند بندغ آتا ناکہ بندی برجاء و اسنیپ چیکنگ مننگ ءِ۔
پسنی ٹی کوسٹل ہائی وے آ سلاہ بند بندغ آک ناکہ بندی کرسا اُلاخ آتِہ پٹ ئہ پول کننگ ءُ۔
مستونگ ئٹ سلاہ بند بندغ آک کسرئے ٹریکٹر ئٹ نسخان تُسر، و دشمن لشکر و سلاہ بند بندغ آتا نیام ئٹ جنگ ئنا ہم حوال ءِ۔
گوادر آن حوالءِ کہ گوادر ئٹی کوسٹل ہائی وے آ ناکہ بندی نا وخت آ پنجاب نا شش بندغ سلاہ بند بندغ آک خلکُنو۔
اندُن سوئی آن پنجاب کن ہنوکا گیس پائپ لائن ئے روجان نا جہہ آ تراک ئنا شورہ تیٹ بھس کننگانے۔
یات مرے کہ تربت شار کیہی ساہت آن سلاہ بند بندغ آتا کوزہ ٹی ءِ و پاکستانی لشکر آ کیہی جلہو ہم کننگانے۔
ہندی حوال تروک آتا رد ئٹ ناُدرست آ سلاہ بند بندغ آک سبی نا ہند کرمو وڈ ئٹی پاکستانی لشکر نا چوکی آ جلہو کرینو۔
جلہو نا وخت سخت سُمکاری نا توار بننگ مسنے، ہندی بندغ آتا رد ئٹ جلہو ہُرے اسکان برجاء مسنے۔ ہندن گُمان ءِ کہ جلہو ئٹی پاکستانی لشکر نا کارندہ غاتِہ جانی و مالی نسخان رسینگانے۔
اُندن سبی مرزانی چیک پوسٹ آ سلاہ بند بندغ آک جلہو کرسا سلاہ تِہ پھُلار و سبی و بختیار آباد نا خُڑک فوج و سلاہ بند بندغ آتا نیام ئٹ بھلو جھڑپ ئس ہم مسنے ہراٹی پاکستانی لشکر ئے جانی نسخان رسینگ نا حوال ءِ۔
دا رد ئٹ دائسکان پاکستانی لشکری کالخواہ تا ہچو درشان مونا بتنے و جلہو تا زمہ واری تہ ہم ہچو تنظیم ئس ہرفتنے۔
