بنجائی ترجمان نا پڑو نا رد ئٹ 25 مارچ آ تیبہ بلوچستان ئٹ شٹر ڈاؤن ہڑتال کننگو، اندن 26 مارچ آ تیبہ بلوچستان ئٹی پریس کلب تا مونا برانز کننگو و جمعہ نا دے 28 مارچ آ پارٹی نا کماش سردار اختر جان مینگل نا کماشی ٹی وڈھ آن کوئٹہ اسکان لانگ مارچ کننگو۔
بلوچستان نیشنل پارٹی نا بنجائی ترجمان نا شنگ کروک بیان نا رد ئٹ شال ئٹ بی این پی نا بنجائی سروک و باسک و ذمہ وار و سینئیر سنگت آتا ہلہلئی مجلس پارٹی نا سینئر نائب صدر ساجد ترین ایڈووکیٹ نا اُروٹی اڈ تننگا۔
ترجمان نا بیان ئٹ پاننگا کہ مجلس ئٹ ڈاکٹر ماہ رنگ بلوچ، سمی دین تون اوار ایلو بلوچ زالبول و ورنا تیا ظلم و زوراکی و بیدادی تِہ سخت آنگا لوز آتیٹ شیف خلنگا و پاننگا کہ بلوچستان نا دود آتِہ اینو نت تا شیف آ لتاڑنگ مننگ ءِ، ساڑی آ حالیت آتیٹ بلوچستان نیشنل پارٹی قومی جماعت ئس مننگ نا سوب آن تینا سیاسی ذمہ واری تا مارشت تخک و پارٹی برانز آتا شیڈول نا باقاعدہ پڑو کیک کہ 25 مارچ آ تیبہ بلوچستان ئٹ شٹر ڈاؤن ہڑتال کننگو، اندن 26 مارچ آ تیبہ بلوچستان ئٹی پریس کلب تا مونا برانز کننگو و جمعہ نا دے 28 مارچ آ پارٹی نا کماش سردار اختر جان مینگل نا کماشی ٹی وڈھ آن کوئٹہ اسکان لانگ مارچ کننگو۔
بیان ئٹ پاننگا کہ برانزی شیڈول نا مسخت دادے کہ ماہ رنگ بلوچ و ایلو زالبول و ورنا و گودی تا بیگواہی، بے بنداو آ ایف آئی آر تِہ واپس ہلنگ مرے و چادر و چھار دیوالی نا شرف ئے لتاڑنگ آن تیبہ بلوچستان ئٹ ہرا خار ودی مسنے اودے بند کننگِہ۔
ترجمان پارے کہ بی این پی نا غُٹ ضلع غا تا صدور، جنرل سیکرٹری، ڈپٹی یونٹ سیکرٹری و باسک آتِہ پنت تننگک کہ شٹر ڈاؤن ہڑتال، برانز و لانگ مارچ تیٹی اوار مریر و الس تون خُڑک حوالکاری تخر۔ مجلس ئٹ ترقی پسند، قوم دوست سیاسی تپہ و الس آن خواست کننگا کہ او بلوچستان نا حالیت آ تینا قومی کڑد ئے سر ایتر۔
