پاکستان نا دارلحکومت اسلام آباد ئٹی بلوچ نسل کشی نا برخلاف بلوچ یکجہتی کمیٹی نا دھرنہ تون اواری کن بلوچستان ئٹی برانز آک برجاء ءُ ۔
سئے شمبے نا دے مستونگ ، پَنجگُور ، گْوادر و مُنگچر ئٹی ہزارہ بندغ آک روڑ آ تے آ پیشتمار ہرافتیٹی زالبول ،چُنا تیتون اوار زوراکی ئٹ بیگواہ مروک آتا خاوت آک اسُر ۔
دا برانزیک دو تیٹ زوراکی ئٹ بیگواہ آ بندغ آتا عکس و پلے کارڈ ،بینرز ہرفسا زوراکی ئٹ بیگواہی کننگ نا سلسلہ ئے بند کننگ نا خواست کرسا پاکستان نا ڈھکوک ادارہ آتا دُو آن بیگواہ آ بلوچ آتا آجوئی نا خواست ئے کریر ۔
مستونگ ئٹی برانزیک ہیت کرسا پاریر کہ تیوعہ بلوچستان اینو برانز کننگءِ ریاست اوفتا خواست آتے بِننگ نا جاگہ اوفتا مقابل ئٹ ڈیتھ اسکواڈ ئے اسلام آباد آ مُچ کننگءِ۔
اوفک پاریر کہ خاوت آتا خواست آک صفاءُ کہ ننا بندغ آ تے آجو کبو و عدالت ئٹی ہتبو ۔
او پاریر کہ بلوچستان ئٹی زوراکی ئٹ بیگواہ آتا مسئلہ بھلُنءِ ہرا بندغی بحران ودی کرو ۔
ضلع پنجگور ئٹی سد آ تا کچ ئٹی زالبول ،چُنا و نرینہ آک روڈ آتے آ بسُر ، او پاریر کہ اینو نن ریاست ءِ دا پیغام ئے تننگ اُن کہ تیوعہ بلوچستان اسلام آباد برانزی تیتون اوار ءِ ۔
برانزیک پاریر کہ بلوچ نسل کشی نا برخلاف اسلام آباد برانز نا مدمقابل منہ بندغ بدنام انگا ڈیتھ اسکواڈ ئے ہتیسا ریاست سخت غیر سنجیدگی کننگ ءِ ۔
او پاریر کہ دُن انگا عمل آن ریاست تینکن پین مسئلہ ودی کننگ ءِ ، بلوچستان حکومت اسہ نیمہ آ مزاکرات نا ہیت ئے کننگ ءِ و ایلو نیمہ آ دا عمل ئے کرسا تینے آ کُل ءِ مخفنگ ءِ ۔
