کوئٹہ آن حوال ءِ کہ اینو دو بجہ نا وختا کلی قمبرانی نا خُڑک، سرف گاڑی ئسیٹی سوار اسہ پولیس کارندہ ئسیتون اوار سول پُچہ آتیٹی بندغ آک، ہرا پاکستانی ڈکھوک ادارہ غا تا کارندہ ءُ، اِرا چنک سن مسڑ زوراکی ئٹ بیگواہ کرینو۔
خن ئٹ خنوک شاہد آتا رد ئٹ کلی قمبرانی نا ہندی اِرا چُنکو مسڑ شہباز خان چوک آ کریک ڈاؤن نا وختا سول گاڑی ٹی وردی و بیدس وردی ٹی سلاہ بند کارندہ غاک، مذلفہ قمبرانی ولد احسان اللہ و آجوئی پنیئو اِرا چنکو مسڑ زور ئٹ گاڑی ٹی تولِفسہ تنیتون درینو۔
ہڑتُما مسن تا سَن 16 آن 17 سال پاننگک ہرا گورنمنٹ ڈگری کالج سیٹلائٹ ٹاؤن کوئٹہ نا خوانندہ ءُ و تینا کالج آج واپس اُراغا بننگ اسُر کہ دا تدینی مس۔
یات مرے کہ اینو بلوچ یکجہتی کمیٹی نا برانز ئٹ پولیس ہند ئے گھیرہ کرے و سُمکاری و بیدادی نا تدینی تیٹی کیہی برانزیک ٹپی مسر۔
پولیس دا وختا برانز جہہ آ و ہیب ئہ کھیب ئٹ کسری آتِہ دزگیر کرے۔
کلی قمبرانی آن بیگواہ کننگوک مسن تا خاہوت آتا پاننگ ءِ کہ اوفک دا تدینی آ سخت فریشن ءُ، اوفک کالخواہ تیان خواست کرینو کہ اوفتا مسن تا آجوئی کن زوت گھام ہرفِر۔
