جیل ئٹی تینا ایڑ ئتون اواردئی نا وختا ڈاکٹر بلوچ سوگو حوصلہ و دلیر خننگا۔ اوڑدئی نا وختا او نہ بیرہ بشخندہ کرسا تینا حوصلے نا درشانی کرے بلکہ تینا ایڑ تون اوار تینا راج کن کلہو ہم تس۔
ڈاکٹر ماہ رنگ بلوچ تینا ایڑ ئے پارے کہ "ننے خُلیفنگ نا ہر منکن کوشست کننگ مننگ ءِ، ولے نن تینا حق و انصاف نا جہد آن پدی مروفن۔ ننا تاغت ننا سیوتی و پرامن مزاحمت ئٹی ءِ۔”
او بلوچ راج ئنا پنا اہمو کلہو ئس تس و پارے کہ "ننا جہد حق و انصاف کن ءِ۔ ننے اوار سلوئی ءِ و پرامن وڑ ئٹ تینا توار ئے بُڑز کروئی ءِ تاکہ ننا جائز خواست آتِہ سرپند مریر۔ ظلم و زوراکی تون مون تننگ آن پد ہم ننے بے حوصلہ مروئی اف، انتئے کہ ہر قربانی ننے مزل اسکان سر کننگ ءِ۔”
اونا ایڑ پارے کہ ڈاکٹر ماہ رنگ بلوچ جیل ئنا سختی تیان پد ہم پرعزم و ثابت قدم ءِ۔ اونا مون آ ہچو مایوسی اف، بلکہ اونا بشخندہ و سوگو لہجہ دا ہیت ئنا شاہدی تننگ اس کہ او ہچو دباؤ ئسے نا مونا کاٹم شیف کننگ کن تیار اف۔
