بلوچ یکجہتی کمیٹی نا ترجمان تینا شنگ کروک بیان ئٹی پارینے کہ پھگہ اسہ وار ئس ولدا بروری بائی پاس نا جہہ آ دے ئنا 12 بجہ غا پر ایمن مزاحمتی برانز اڈ تننگ مرو۔
او پارے کہ ہراوختسکان ریاستی ظلم و زوراکیک برجاء ءُ و بلوچ راہشون ڈاکٹر ماہرنگ بلوچ، بنجائی باسک بیبگر بلوچ، بیبو بلوچ تون اوار ایلو غُٹ زوراکی ئٹ بیگواہ کننگوک و دزگیر کننگوک سیاسی باسک آک سرسلامت آجو متنو، بلوچ راج چپ تولپرو۔
او پارے کہ نن بلوچ راج ئنا سمائی آ مخلوق، سیاسی باسک، صحافی، اسکالر، عام، تاجر برادری، زالبول، مزور و چنا تیان اوار مننگ نا خواست کینہ۔ انتئے کہ راجی مزاحمت ننا بقاء نا ضمانت ءِ، و ظلم ئنا برخلاف چپی ظالم تون اوار مننگ نا بریبر ءِ۔
ایلو کنڈ آن بلوچ یکجہتی کمیٹی کیچ ہنکین نا پارہ غان پڑو کننگانے کہ پگہ تربت ئٹ شہید فدا چوک آ 12 بجہ غا و بلیدہ ئٹ مھناز ہائی سکول آن شہید ایوب چوک اسکان سہب ئنا دہ بجہ غا برانزی ریلی کشنگ مرو۔
او کیچ ئنا مخلوق آن خواست کرینو کہ دا برانز آتیٹ اوار مریر۔
خیال ئٹ مرے تدوکا دے تیٹی پاکستانی ریاست نا لشکری کارندہ غاک بلوچ یکجہتی کمیٹی نا پُر ایمن برانز آ کریک ڈاؤن نا وختا مُسہ بندغ شہید کریر و کیہیک ٹپی کننگار۔ ہندن درو بی وائی سی نا راہشون ڈاکٹر ماہ رنگ بلوچ تون اوار ایلو سیاسی باسک آتِہ دزگیر کننگا، دا تدینی تا برخلاف تیبہ بلوچستان ئٹ برانز آک برجاء ءُ۔
