بلوچستان لبریشن فرنٹ (بی ایل ایف) نا ترجمان میجر گہرام بلوچ تینا شنگ کروک بیان ئٹی پارینے کہ بی ایل ایف نا سرمچارک نوزدہ مارچ آ تمپ ئٹی ایم آئی نا کمک ئٹ کاریم کروکا ریاستی جہی آ لشکر ڈیتھ سکواڈ نا کارندہ، تمپ ئنا جہی جلائی ولد اللہ بخش ئے سُم کاری کرسہ کھسفیر و اونا سِلاہ ئے دوئی کریر۔ جلہو نا وخت آ جلائی تون ریاستی لشکر نا اسہ پین کارندہ ئس ہم اس ہرا نرّا کشا تینے، ولے تنظیم تون او پیدوار ءِ و زو ئس اودے اونا سزا تننگو۔
گہرام بلوچ نا پاننگ اس کہ ریاستی کارندہ جلائی ہنوکا کیہی سال آتان بلوچ راجی آجوئی نا جہد ئنا برخلاف کاریم کریکہ و گومازی، ملانٹ، پُل آباد، ملک آباد و نزر آباد تمپ ئٹی بلوچ ورنا تا زوراکی نا بیگواہی، خلنگ کھسفنگ و نشہ نا کاروبار ئٹی اونا دُو اس۔
ترجمان پارے کہ ہندن ہنوکا تو ئٹی گومازی ٹی چھنک سن ورنا معراج بلوچ، کریم بلوچ و ایلو ورنا تا شہیدی ٹی جلائی نا لشکر نا دُو اس۔ دا لشکر بھاز آ بلوچ ورنا تہ پاکستانی لشکت نا دو آن زوراکی ئٹ بیگواہ کرفنگ کن ہم کاریم کریکہ۔ تنظیم تون دا لشکر نا غٹ کارندہ غاتا حوال ساڑی ءِ و زو ئس اوفتہ اوفتا ایسر اسکان سر کننگو۔ دا جلو ئٹی بےڈوہ طاہر پِنی آ بندغ سُم کاری ٹی برسہ ٹپی مس، ہراڑا ننے افسوس ءِ و تنظیم ٹپی مروکا طاہر و اونا خاہوت آن بشخنداری خواہک۔
ایسر ئٹ میجر گہرام نا پاننگ اس کہ بلوچستان لبریشن فرنٹ ریاستی کارندہ جلائی نا کھسفنگ نا زمہ واری ئے ارفک و بلوچستان نا آجوئی اسکان کوزہ گیر فوج و اونا کارندہ غاتیا جلہوک برجاء مرور۔
