بلوچستان ئٹی زوراکی نا بیگواہی تا لڑ برجاء، ڈیرہ بگٹی آن کیہی بندغ آک پاکستانی لشکر نا دو آن بیگواہ، شش ئنا چاہنداری مس۔
شابیتی حوال تا رد ئٹ درے نن شادمان بگٹی نا مار طاہر ئے ایف سی اونا اُعاغا چھاپہ نا وختا زوراکی ئٹ بیگواہ کرینے و محمد بخش نا مار ریاض ئے ڈیرہ بگٹی نا بنجائی بازار آن پاکستانی لشکر بیگواہ کرینے۔
داکان بیدس ڈیرہ بگٹی شار ئٹی اسہ اُرا ئسے آ پاکستانی لشکر چھاپہ خلِسہ رضا محمد ولد محمود بگٹی ئے بیگواہ کرینے و ڈیرہ بگٹی ٹی جانی خان بگٹی نا اُراغا چھاپہ خلِسہ اونا مار علی خان بگٹی ئے ہم بیگواہ کرینے۔
ایلو کنڈ آن سوئی آن مٹھو بگٹی نا مار عارف پنیئو دکاندار ئسے پاکستانی لشکر اونا دکان آن بیدادی کرسا ہرفینے بیگواہ کرینے۔ اندن سوئی نا تحصیل بازار نا جتھ ہوٹل آن انور ولد ریحان بگٹی ئے سی ٹی ڈی کا کارندہ غاک بیگواہ کرینو۔
