بلوچ آجوئی دوست سروک رحیم بلوچ ایڈوکیٹ چاگڑدی حوالکاری میڈیا غا، کوئٹہ ئٹ ریاستی زوراکی نا رد ئٹ تینا ردعمل ئے ترسا پارے کہ زوراکی نا بیگواہی، جعلی فوجی کاروائی تیٹ بیگواہ کننگوک بلوچ آتا خون، و بلوچ شہید آتا جون تِہ چاہنداری نا عمل آن گدرینگ آن بیدس نن ئنا تہارمئی ٹی کھڈ کننگ کون آ ریاستی ڈوہ تا برخلاف بلوچ آتا پُرامن برانز آ ہرا وڑ شال ئٹ ریاست نا نہار آ لشکر سمکاری و بیدادی کرسا مُسہ بےڈوہ بلوچ شہید و کیہی تِہ ٹپی کرسا کوئٹہ ئے دتر ئٹ سِلانے داڑان ریاست نا ہربشی مننگ پھاش مریک۔
او پارے کہ اسَل ئٹ بندغی حق آتا لتاڑ نا برخلاف بلوچ الس ئنا دلیرانہ مزاحمت و آجوئی کن بلوچ راج ئنا عزم ریاست ئے ہربشی کرینے۔ ہربشی مروک و سار آن ہنوک کوزہ گیر ریاست بلوچ راج ئنا توار ئے توننگ کن پین بیدادی و فسطائیت کننگ ءِ۔ ریاست بلوچ آتا جون تِہ بِٹسہ اوفتِہ چُپ کرفنگ نا احمقانہ پالیسی آ عمل کننگ ءِ، دا فسطائی پالیسی و ریاستی دہشتگردی یقینیکا کوزہ گیر ریاست نا تباہی و شکست آ ایسر مرو۔
