بلوچ یکجہتی کمیٹی نا راہشون ڈاکٹر ماہ رنگ بلوچ و ایلو باسک آتا دزگیری نا برخلاف بلوچستان ئٹی پہیہ جام، شٹر ڈاؤں ہڑتال و برانز آک برجاء ءُ۔
ایجو سہب ئنا پولیس کوئٹہ ٹی جون تتون اوار تولوک برانز کروک برانزی تا برخلاف کریک ڈاؤن کرسا ڈاکٹر ماہ رنگ بلوچ تون اوار کیہی بندغ آتِہ دزگیر کرے۔
بلوچ یکجہتی کمیٹی نا بنجائی باسک صبیحہ بلوچ پارے کہ نن جون تِہ تخِسہ تولوک اسنُ، سہب ئنا پنچ بجہ غا دوارہ کریک ڈاؤن کننگا و ڈاکٹر ماہ رنگ بلوچ تون اوار کیہئ بندغ آتِہ دزگیر کننگا۔ اوکان پد ننے ہچ سما اف۔ پولیس جون تِہ ہم تینتو درینے۔
صبیحہ بلوچ نا پاننگ اس کہ ننے ایمنیبئٹ برانز نا حق ہم تننگ افس و رامن باسک آتیا بیدادی کننگ مننگ ءِ۔
بی وائی سی نا پڑو آ کوئٹہ، مستونگ، قلات، خضدار، چاغی، نوشکی، واشک، تربت، پنجگور، حب چوکی تون اوار تیبہ بلوچستان نا کیہی شار تیٹ پہیہ جام و شٹرڈاؤن ہڑتال و تولوک برانز آک برجاء ءُ۔
کوئٹہ ئٹ کسر تیا ہن ئہ بر کم و دکان و مارکیٹ آک بند ءُ۔ سریاب روڈ، قمبرانی روڈ، بروری روڈ تون اوار کیہی علاقہ تیٹ برانزیک کسر تیا گشت کننگ ءُ۔ شار ئٹ موبائل نیٹورک بند ءِ و سکیورٹی ودفنگانے۔
خیال ئٹ مرے جمعہ نا دے بلوچ یکجہتی کمیٹی نا پارہ غان بیبرگ بلوچ تون اوار ایلو سروک و باسک آتا دزگیری نا برخلاف برانزی ریلی کشنگاسس، ہراڑا پولیس جلہو کرے و برانزی تیا سمکاری کرے۔
سمکاری نا سوب آن کیہی بندغ آک بیران مسر و ٹپی مسر، بیران مروکا تا جون تِہ تخسہ بی وائی سی نا راہشون ڈاکٹر ماہ رنگ بلوچ نا بھلنی ٹی سریاب روڈ آ تولوک برانز بناء کریر۔ ہمو تولوک برانز آ اینو سہب ئنا پولیس نا تاغت کاریم ئٹ ہتسِہ جون تِہ دوئی مس و کیہی باسک آتِہ دزگیر کرے۔
ایسری حوال اسکان پاننگک کہ ڈاکٹر ماہ رنگ بلوچ ئے ہدہ جیل ئٹ تخنگانے۔
