ایمنسٹی انٹرنیشنل کوئٹہ ٹی پرامن بلوچ برانزی تیا بیدادی و سمکاری نا تدینی ئے شیف خلِسہ دا رد ئٹ پٹ ئہ پول نا خواست کرینے۔
کوئٹہ آن رسینگوکا حوال تا رد ئٹ پولیس نا سمکاری آن کم ئس کم پنچ برانزی بیران و کیہیک ٹپی مسنو، ایمنسٹی انٹرنیشنل دا تدینی ئے پاکستانی خوالخواہ تا کنڈ آن بندغی ساہ تا بے قدری و شاری تا حق ئنا سخت لتاڑ پارینے۔
بندغی حق آتا تنظیم نا پاننگ ءِ کہ کوالخواک پرامن برانز کروکا تا حق ئے لتاڑِسہ بھلو کچ ئسیٹی بندغ آتِہ دزگیر کرینو و آنسو گیس کاریم ئٹ ہتِسہ پرامن و دو ہورک آ برانزی تیا نسخان تروک سلاہ بے قانودی کاریم ئٹ ہیسُنو ہرا کہ افسوس نا ہیت ئس ءِ و بے بندغی کاریم ئس ءِ۔
ایمنسٹی انٹرنیشنل نا رد ئٹ کوئٹہ ٹی موبائل نیٹ ورک ئے بند کننگ نا سوب آن معلومداری تا ہلࣿ ئہ تس ئے توننگانے۔
ایمنسٹی انٹرنیشنل پاکستانی کوالخواہ تیان خواست کرینے کہ او پرامن برانز کروکا تا برخلاف بے قانودی کریک ڈاؤن ئے دمدستی بند کیر او پرامن برانز و درشانی نا آجوئی نا حق ئنا باور ایتر ہرا کہ پاکستان نا جہانی بندغی حق آتا رد ئٹ ذمہ واری ءِ۔
بیان ئٹ پاننگا کہ دا غُٹ برانز کروکا تِہ بیرہ برانز ئنا حق ئے کاریم ئٹ ہتنگ نا سوب آن دزگیر کننگانے اوفتِہ زوت یلہ کننگِہ۔
تنظیم کولخواہ تیان خواست کرینے کہ بے قانودی تاغت کاریم ئٹ ہتنگ ئے دمدستی تورِہ و غیر جانبدارانہ پٹ ئہ پول کے او ذمہ وار تِہ انصاف نا تلہ غا ہتے۔
