صوبائی حکومت نا ترجمان شاہد رند پارے کہ پولیس قانود نا ردئٹ برانز کروک آتا برخلاف کاروائی کرینے ۔
حکومت بلوچستان نا ترجمان شاہد رند پارے کہ بلوچ یکجہتی کمیٹی بنجائی کسر ئے بند کرے الس ئے فریشانی مس، کسر تا بند مننگ نا سوب آن کراچی و گیشتر شار تیان بروکا مسافر تِہ ہم فریشانی مس۔
صوبائی حکومت نا ترجمان نا پاننگ اس کہ برانزی تا برخلاف پولیس قانود نا ردئٹ کاروائی کرینے۔
حکومتی ترجمان دوبہ خلکنے کہ کوئٹہ ٹی برانز کروک آک پولیس ئے خل خلکر و بےدادی کریر ہمو وخت لیڈی پولیس کانسٹیبل و پولیس کارندہ غا تون اوار دہ بندغ ٹپی حالیت ئٹ اسپتال آ ہتنگانو۔
شاہد رند دوبہ خلسہ پارے کہ امن و امان ئٹی ہڑاند شاغِسہ ہربشی تالان کننگ ءُ۔ قانود ئے دوٹی ہلنگ نا اجازت تننگ مفک، قانود ئے دوٹی ہلِسہ امن نا مسخرہ جوڑ کننگا گڑا حکومت چُپ سیل کروف ۔
خیال ئٹ مرے کہ اینو بلوچ یکجہتی کمیٹی نا پارہ غان زوراکی ئٹ بیگواہی تا برخلاف برانز نا بست و بند کننگاسس ہراڑے پولیس کریک ڈاٶن کرسہ آنسو گیس و واٹر کینن کاریم ئٹ ہیس اندن ہمو وخت پولیس نا سم کاری آن کیہی برانزیک ٹپی مسر۔
بلوچ یکجہتی کمیٹی کہوکا برانزی تا جون تِہ سریاب کوئٹہ ٹی تخسہ تولوک برانز کننگ ءِ اندن پگہ تیوہ بلوچستان ئٹ شٹرڈاٶن و پہیہ جام ہڑتال نا کال تننگانے ۔
