بلوچستان نا بنجائی شار کوئٹہ ٹی پاکستانی لشکر نا برانزی تیا سُمکاری و شیلنگ، کم آن کم مُسہ برانزی بیران، کیہیک ٹپی۔
بلوچ یکجہتی کمیٹی نا راہشون ڈاکٹر ماہ رنگ بلوچ پارے کہ ریاست پاکستان پرامن برانزی تیا بیدس تفریق سُمکاری کرسہ قیامت نا ندارہ جوڑ کرے۔
او پارے کہ کوئٹہ نا اُلس تینا اُرا تیان پیشتمِہ، شہید آتا جون تتون سریاب آ تولوک برانز برجاء ءِ، اُلس زوت سریاب برانز آ سر کے تینے۔ سول اسپتال ئٹی ٹپی آتیکن دتر نا گرج ءِ۔
یات مرے کہ دا وختا 35 آن زیات بندغ ٹپی ءُ، ہرافتان 7 ئنا حالیت بھاز خراب ءِ، اندون مُسہ بندغ بیران مسنو۔
بلوچ یکجہتی کمیٹی تینا بیان ئٹ پارے کہ جون تِہ منیر احمد روڈ آ ہتِسہ برانز بناء کننگانے۔ نن بلوچ قوم آن خواست کینہ کہ او منیر احمد روڈ آ سرمریر و دا زوراکی نا برخلاف توار بڑز کیر۔
