بلوچ یکجہتی کمیٹی نا راہشون ڈاکٹر ماہ رنگ بلوچ چاگڑدی حوالکاری میڈیا غا پوسٹ ئس کرسا پارینے کہ بلوچستان نا بنجائی شار شال ئٹ دا وختا ننا پُرایمن تولوک برانز نا برانزیک ریاستی سیکورٹی لشکر نا بیدس جواز و زوراکی ئٹ کروک کریک ڈاؤن تون مون تننگ ءُ۔ ننا کیہی سنگت آک ہرافتیٹ چُنا نیاڑی ہم اوار ءِ، دزگیر کننگانو و اوفتا بارو ئٹ ہچو حوال رسینگ ئٹی اف۔
او پارے کہ سیکورٹی لشکر تینا مون سمکاری و آنسو گیس شیلنگ کننگ ءِ، ہراڑان ساہ ئے بند کروک ماحول ئس ودی کننگانے و داڑان برانز ئٹ ساڑی کیہی کماش و چُنا تتون اوار ایلو برانزی تا جانجوڑی زیمی مننگ ءِ۔
اونا پاننگ اس کہ کوئٹہ ٹی حوالکاری بست و بند تیبہ بند کننگانے، موبائل نیٹ ورک و انٹرنیٹ ئے ہامدیکا بند کننگانے تاکہ معلومداری تِہ ڈنی جہان اسکان سر مننگ آن توننگ مرے۔
اونا ودیک پاننگ اس کہ سیکورٹی لشکر خُڑک ئنا علاقہ غا تیٹ ہم چھاپہ خلکنے، زور ئٹ ایلو باسک آتِہ دزگیر کننگانے و خاہوت آتِہ بیم ئنا گواچی کننگانے۔
او پارے کہ پرامن اختلاف رائے ئے بیدادی ئٹ توننگ بنداوی بندغی حق آتا پھاش لتاڑ ءِ۔ ای انصاف نا غُٹ مُخ تف، بندغی حق آتا تنظیم و جہانی کہول آن خواست کیوہ کہ او دا زوراکی نا دمدستی نوٹس ہلیر و ذمہ وار کوالخواہ تیان ورندی ہلیر۔
