شال آن راولپنڈی و پشاور آ ہنوکا جعفر ایکسپریس آ 11 مارچ آ بلوچ آجوئی خواہوک سلاہ بند تنظیم بلوچ لبریشن آرمی (بی ایل اے) جلہو کرِسہ ریل ئے یرغمال کرے۔ بی ایل اے نا بیان نا ردئٹ اوفک 100 آن زیات پاکستانی لشکر نا کارندہ بندی کریر ہرافتیٹ پاکستانی آرمی، آئی ایس آئی و ایلو سلاہ بند ادارہ غا تا کارندہ غاک اوار اسُر۔
سلاہ بند تنظیم دا وخت آ پاکستانی حکومت آن بندی تا بدل ئٹ بلوچ بندی تِہ یلہ کننگ نا پارے، ولے پاکستانی حکومت نمن مس۔ بی ایل اے نا ردئٹ او کُل 214 لشکری کارندہ غاتِہ کھسفینو۔
ایلو پارہ غان پاکستانی لشکر نا پاننگ ءِ کہ بیرہ 3 پاکستانی لشکر نا کارندہ خلنگ مسُنے ہرافتا چائنداری پک کننگانے۔ واہم پاکستانی لشکر نا پارہ غان مونا ہتوکا کچ آ سوج ودی مننگ ءِ، انتئے کہ پاکستانی لشکر نا کارندہ غا تا خاہوت آک تینا بندغ آتا جون تا، یا کم ئس کم اوفتا سلامتی نا ردئٹ معلومداری دوئی کننگ نا کوشست ئٹی ءُ۔
خاہوت آتا ردئٹ اوفتا بندغ آک موکل آتا پورہ مننگ آن گڈ ہندا ریل ئٹ بننگ اسر، ولے آئی ایس پی آر نا بیان آن پد دا چائنگ ئٹی ہڑاند ودی مننگ ءِ کہ اوفتا بندغ آک زندہ ءُ یا کھسکنو۔
خاہوت آتا پاننگ ءِ کہ اگہ اوفک خلنگانو تو اوفتا جون تِہ ہتیر اگہ زندہ ءُ تو اوفتا خیریت نا حوال ئے ایتر۔
