تدوکا دے تیٹ سول اسپتال ئٹ ہتنگوک جون تا چاہنداری کن بروک خاہوت آتِہ پولیس بیدادی نا گواچی کرسا دزگیر کرے ہرا دائسکان کوئٹہ سول لائن پولیس تھانہ ٹی بند ءُ۔
ننکان دزگیر مروک نیاڑی تا سیال و وکیل آک پولیس تھانہ غا ہنِسہ اوفتتون اوڑدئی نا کوشست کریر ولے وکیل آتا پاننگ نا رد ئٹ نیاڑی تِہ تھانہ ٹی بند کننگانے و نرینہ غا تِہ نادرستو جاگہ ئس دننگانے۔
خیال ئٹ مرے جعفر ایکسپریس آ جلہو آن گڈ سول اسپتال کوئٹہ ٹی بیست و سئے جون ہتنگاسس ہرافتا رد ئٹ زوراکی ئٹ بیگواہ کننگوک بندغ آتا خاہوت آتِہ خُلیس اس کہ او بیگواہ کننگوک بندغ مننگ کیرہ، اندا سوب آن خاہوت آک اوڑے جون تا چاہنداری کن بسر۔
دا وختا خاہوت آک پنچ جون چاہنداری آن گڈ دوئی مسر ہراکان گڈ پولیس نا بھلو کچ ئس سر مرسا چُنا نیاڑی تیا بیدادی کرے و دزگیر کرے۔ دا وختا سعیدہ بلوچ ہم اوارے ساڑی اس ہرا نا اسہ ایلم ئس و ایلم نا مار ئس بیگواہ ءِ۔ سعیدہ بلوچ تون اوار اونا ایڑ ئے ہم دزگیر کننگا۔
ایلو کنڈ آن استو نن نیمہ غا بلوچستان نا بنجائی شار شال ئٹ پاکستانی لشکر، پنی آ بلوچ شئیر خلوک و پروفیسر نوشین قمبرانی نا اُراغا چھاپہ خلک و اُرا نا بندغ آتِہ بیدادی نا گواچی کرے۔
کوئٹہ نا اسپنی روڈ آ ترخام ئٹ ساڑی پروفیسر نوشین قمبرانی نا اُراغا نن نیمہ غا پاکستانی لشکر و سی ٹی ڈی نا چھاپہ نا تدینی ئے سیاسی و چاگڑدی تپہ غاک شیف خلکنو۔ چھاپہ نا وختا نوشین قمبرانی اوڑے ساڑی الو۔
یات مرے تدوکا دے تیٹ نوشین قمبرانی نا ایلم ناصر قمبرانی بیگواہ کننگانے۔ او تینا ایلم و سیال آتون اوار کیہی ورنا تا زوراکی نا بیگواہی نا برخلاف جہد کننگ ءِ و او تینٹ اسہ سیاسی و چاگڑدی باسک ئس مننگ تون اوار براہوئی زبان نا شئیر خلوک ئس ہم ارے۔
نوشین قمبرانی و ایلو خاہوت آک درو پریس کانفرنس کرسا پاریسر کہ اگہ ناصر قمبرانی و ایلو بندغ آتِہ 24 ساہت ئٹ آجو کتور گُڑا نن برانز کرسا کسر تِہ بند کرون۔
