وزیراعلیٰ بلوچستان سرفراز بگٹی پارے کہ جون تا چاہنداری مفننگ نا سوب آن اوفتِہ کھڈ کننگا۔
سرفراز بگٹی بنجائی وزیر آتون اوار میڈیا تون ہیت کرسا پارے کہ جعفر ایکسپریس جلہو ئٹی خلنگ مروکا نادُرست آ جلہوکار تِہ ایدھی فاؤنڈیشن نا ذریعت ئٹ کھڈ کننگانے۔
سرفراز بگٹی نا رد ئٹ ہرا جون تا چائنداری منکن الو اوفتِہ کھڈ کننگانے و ہرا جون تا چاہنداری مننگ ءِ اوفتِہ خاہوت آک قانودی وڑ ئٹ دوئی کرور۔
میڈیا تون ہیت کرسا سرفراز پارے کہ ریاست نا برخلاف جنگ بناء مسنے دا چُنکو تدینی افس، ہرافک ریاست ئے پرغنگ خواہرہ اوفتِہ گندہ ءُ ایسر تون مون تروئی تمو۔
یات مرے کہ تدوکا دے تیٹ کوئٹہ نا ہندی بندغ آک کاسی قبرستان ئٹی سینزدہ نادُرستو قبر ئنا حوال ئے مونا ہیسوسر۔ ہندی بندغ آک پاریر کہ ننکان پولیس نادُرست آ بندغ آتا جون تِہ ہتِسہ کھڈ کرینے۔
اینو میڈیا تون ہیت کرسا سرفراز پارے کہ دا قبرآک ہمو بندغ آتا ءُ ہرافک جعفر ایکسپریس آ جلہو کرینو۔
یات مرے کہ اندا توو 11 مارچ آ بلوچ آجوئی خواہوک سلاہ بند تنظیم بلوچ لبریشن آرمی کوئٹہ آن پشاور و لاہور آ ہنوکا جعفر ایکسپریس ئے جلہو کرسا اِرا سد آن زیات پاکستانی لشکری کارندہ غاتِہ بندی کریسس۔
بلوچ لبریشن آرمی بولان جعفر ایکسپریس و پاکستانی لشکر تون جنگ آتیٹی تینا سیزدہ سرمچار نا شہید مننگ نا حوال ئے پک کریسس و اوفتا عکس و شابیتی حوال تِہ ہم میڈیا ٹی شنگ کریسس۔
ایلو پارہ غان بلوچستان نا سیاسی و سول سوسائٹی اندا خُلیس نا درشانی کننگ ءِ کہ کاسی قبرستان ئٹی ڈھکوئیکا ہرا جون تِہ کھڈ کننگانے و سول اسپتال ئٹی ہتوکا کیہی جون تیٹی بلوچستان آن زوراکی ئٹ بیگواہ مروکا بندغ آک ہم اوار ءُ۔
سیاسی و بندغی حق آتا تنظیم آک کالخواہ تیان دا جون تِہ کشنگ و چاہنداری کننگ نا خواست کرینو۔
