بلوچ نسل کشی نا برخلاف و اسلام آباد ئٹی بلوچ برانزی تیتو اواری کن ایلو ڈیہہ تہ وڑ کینیڈا و جرمنی ٹی برانز کننگا ۔
دا حوال ئٹ بلوچ نیشنل موومنٹ نا نیمہ آن جرمنی ٹی بلوچ، سندھی و پشتون کمیونیٹیر آتا نیمہ آن کینیڈا ئٹی برانز کننگا ہراٹی بندغ آتا بھلو کچ ئس بس ہرافتیٹ درانڈیہہ مروک آ بلوچ سیاسی باسک و سول سوسائٹی نا باسک آک تُد اسُر ۔
جرمنی برانز ئنا رد ئٹ بلوچ نیشنل موومنٹ نا پاننگءِ کہ برانز نا مسخت بلوچستان ئٹی پاکستانی لشکر نا نیمہ آن بندغی حق آتا خلاف ورزی تے نشان تننگ و زوراکی ئٹ بیگواہی تہ برخلاف برجاءِ اِنگا تحریک نا نیمہ آ جہانی طاقت آتا توجہ ہتنگءِ، دا وخت برانزی تے اسلام آباد پولیس نا نیمہ آن بلوچ نسل کشی نا برخلاف پرامن لانگ مارچ نا برانزی تے آ طاقت نا استعمال کننگ آ تنقید نا گواچی کننگءُ ۔
ہندا رد ئٹ بی این ایم نا سینٹرل کمیٹی ممبر حمل خان برانزی تون ہیت کرسا پارے کہ ریاستی ادارہ آک دروغ ئنا مقابلہ ٹی بالاچ مولا بخش ئے دزگیری ٹی خلکُر ہرانا برخلاف بش مروکا تحریک اسہ بندغ یا خاوت نا افک بلکن دا تیوعہ بلوچ راج نا نمائندہ تحریک ءِ ،ہرا جغرافیائی حد بندی تے ختم کرسا اجتماعی بلوچ راجی شعور ئے کارمرز کرسا بلوچ راج ئے اسٹ کرے ۔
بی این ایم جرمنی نا صدر اصغر بلوچ زوراکی ئٹ بیگواہ مروکا خاوت آ تا دردئے درشان کرسا بلوچ زالبول آتا مزاحمتی کڑدار نا تعریف ئے کرے ۔ او 2009 آ زوراکی ئٹ بیگواہ مروکا ذاکر مجید نا لُمہ نا ہمت نا مثال ئے پارے کہ دا لُمہ نا تینا بیگواہ مروکا مار اکن دمدرینپروکو جُہد ئسے ۔
جرمنی نا برانزیک ہندا وخت آ بلوچستان ئٹی بندغی حق آتا خلاف ورزی تہ پٹ و پول و ذمہ وار آتا احتساب کن اقوام متحدہ آن مداخلت نا خواست کریر ۔
بلوچستان تون اوار ایلو ڈیہہ تہ وڑ یک شمبے نا دے کینیڈا ٹی ہم بلوچ بندغی حق آتا کونسل ”بی ایچ آر سی “ نا نیمہ آن اسلام آباد ئٹی بلوچ برانزی تون اواری یکجہتی و بلوچستان آن بیگواہی تا برخلاف ٹورانٹو ٹی برانز کننگا ہراٹی کینیڈا ئٹی رہینگوکہ بلوچ سیاسی باسک آ تون اوار کینیڈا سول سوسائٹی و سندھی ،پشتو کمیونٹیز آ تا باسک آک اوار مسُر۔
