بلوچ یکجہتی کمیٹی نا بنجائی کمیٹی نا بنجائی سروک بیبرگ زہری و اونا ایلم حمل بلوچ ئے پاکستانی لشکر زوراکی ئٹ بیگواہ کرینے۔
دا رد ئٹ بلوچ یکجہتی کمیٹی پڑو کرینے کہ او بلوچستان یونیورسٹی نا مونا برانز اڈ ایتور۔
بی وائی سی تینا بیان ئٹ پارینے کہ 20 مارچ ئنا سہب کم ئہ ود 30 :5 نا وختا، ریاستی لشکر نا کارندہ غاک، بیرہ پن ئنا کاٶنٹر ٹیررازم ڈیپارٹمنٹ (CTD) کوئٹہ ٹی بیبرگ زہری نا اُرا غا چھاپہ خلِسہ اودے و اونا ایلم ئے زوراکی ئٹ دزگیر کریر۔ بے دادی نا دا پھاش کاروائی ٹی پی ایچ ڈی ہولڈر ڈاکٹر حمل بلوچ ئے ہم بیگواہ کننگا ہرانا مسخت بلوچ آتا توار ئے چُپ کرفنگ ءِ۔
بیان ئٹ پاننگا کہ بی وائی سی پھاش وڑ ئٹ دا بیدس قانود بیگواہی نا مذمت ئے کیک و ہڑتمکا بندغ آتا زوت و بیدس شڑط یلہ کننگ نا خواست کیک۔
اندن چاگڑدی حوالکاری میڈیا غا اسہ پڑو ئسیٹ بی وائے سی نا کنڈ آن پاننگا کہ بلوچ یکجہتی کمیٹی نا بنجائی سروک بیبگر بلوچ و اونا ایلم نا بیگواہی و زوراکی نا بیگواہی تا گواچی بندغ آتا خاہوت سعیدہ فیصل و ایلوفتا دزگیری نا برخلاف اینو سریاب روڈ، بلوچستان یونیورسٹی نا مونا برانز کننگو۔
او پاریر کہ نن کوئٹہ نا سمائی آ الس آن خواست کینہ کہ او دا ظلم ئنا برخلاف توار بڑز کیر و برانز ئٹ اوار کریر۔
برانز اینو سئے بجہ غا سریاب روڈ، بلوچستان یونیورسٹی نا مونا اڈ تننگو۔
