کراچی نا جتا جہہ تیٹ، ہراڑے گیشتر آبادی بلوچ آتا ءِ، سندھ پولیس و رینجرز نا کارندہ غاک اینو بھلو کچ ئسیٹی سرچ آپریشن بناء کرینو ہراٹی جہی بندغ آتیا بیدادی و کیہی بندغ آتا دزگیری نا حوال بسنے۔
پولیس و رینجرز نا کنڈ آن آپریشن کراچی نا علاقہ ماڑی پور، یونس آباد محلہ و ہیب ئہ کھیب ئٹ بناء کننگانے ہراڑے گیشتر بلوچ آک رہینگرہ۔
جہی حوالکار تا رد ئٹ سندھ رینجرز و نیوی نا کارندہ غاک آپریشن نا وخت آ کیہی اُرا تیا چھاپہ خلکر و اُرا تا چارد و چھار دیوالی نا شرف ئے لتاڑار۔ دا وختا زالبول، چنا و کماش آک ہم بیدادی نا گواچی مسر۔
ماڑی پور و اونا خڑک ئنا جہہ تیٹ جہی مچھی ہلوکا تا اُرا تِہ بلڈوزر نا زریعت ئٹ بھس کننگ و زمین تیا کوزہ کننگ نا ہم حوال ءِ۔
جہی بندغ آتا پاننگ ءِ کہ حکومت نا کنڈ آن اوفتا اُرا تِہ بلڈوزر نا زریعت ئٹ پرغنگانے۔ و ہراتم الس تینا حق ئکن توار بڑز کیک گڑا لشکر تاغت کاریم ئٹ ہتیک، مخلوق نا اُرا تا چادر و چھار دیوالی نا شرف ئے لتاڑنگک و زالبول و چنا تیا بیدادی کننگک۔
جہی مخلوق نا پاننگ ءِ کہ او دا بے قانودی و بے بندغی عمل آ چپ مفرور و تینا زمین آتیا کوزہ مننگ الپرور۔
اوفتا پاننگ اسک کہ حکومت نا کنڈ آن ننا ویل آتِہ ایسر کننگ نا جاگہ غا تاغت کاریم ئٹ ہتنگک۔
