بلوچستان نا بنجائی شار شال و حب چوکی آن پاکستانی لشکر اِرا بندغ زوراکی ئٹ بیگواہ کرینے اندن اسٹ نوشکی آن آجو کننگانے۔
حوال تا رد ئٹ پاکستانی لشکر استو دو بجہ نا وختا شال ئنا ہند کلی کمبرانی ٹی چھاپہ خلِسہ حاجی عبدالرحمان قمبرانی پنیئو بندغ ئس دزگیر کننگ آن گڈ بیگواہ کرینے۔
حوال تروکا تا رد ئٹ داکان مُست ہم پاکستانی لشکر اونا خاہوت نا ہفت بندغ زوراکی ئٹ بیگواہ کرینے ہرافتا آجوئی کن خاہوت برانز ہم کرینے۔ حاجی عبدالرحمن تینا خاہوت نا بیگواہ کننگوک ہشتمیکو بندغ ءِ۔
اندن حب چوکی آن حوال رسینگانے کہ پاکستانی ڈھکوک ایجنسی تا دو آن اسہ بندغ ئس بیگواہ کننگانے ہرا مبارک بلوچ نا مار جمیل عابد نا پن ئٹ درست مسنے۔
پن کروک ورنا کوشک بلیده نا جہی و بلوچی زبان نا شائر ئس ءِ۔ پاننگک کہ ورنا 9 مارچ آ ویگہ نا پنچ بجہ غا حب چوکی نا علاقہ بھوانی آن بیگواہ کننگانے و دائسکان اونا ہچ ڈس اف۔
ایلو کنڈ آن نوشکے آن پاکستانی لشکر نا دو آن بیگواہ کننگوک شکیل احمد آجو مسنے و سرسلامت تینا اُراغا سر مسنے۔
شکیل احمد نا آجوئی نا حوال ئے اونا خاہوت پک کرینے۔
