بلوچستان نا ضلع کیچ ئنا علاقہ بلیدہ ٹی پاکستانی لشکر ئے اسہ وختا اِرا بمب جلہو ئٹ ٹک کننگانے، اندن اسہ بمب جلہو ئس زامران ئٹ کننگانے۔
اینو سہب ئنا کیچ ئنا علاقہ بلیدہ، زیردان ئٹی نادرست آ بندغ آک مُست آن کھڈ کروک تراکی آ مواد آتا زریت ئٹ پاکستانی لشکر نا بمب ڈسپوزل اسکواڈ نا پندھ آ ہنوک کارندہ غا تِہ ہموتم ٹک کریر ہراتم او کسر ئے ساف کننگ ئٹ آختہ اسر۔
تراک آن گڈ ہیلی کاپٹر آک علاقہ ٹی خننگ مسنو۔
جہی حوال تا رد ئٹ کھئوکا و ٹپی آ کارندہ غا تِہ ہیلی کاپٹر آتیٹ تربت آ راہی کننگانے۔
تراک ئنا سوب آن اِرا کارندہ مرگ ئنا گواچی و اسٹ ٹپی مس واہم کوالخواک دا رد ئٹ ہچ پاتنو۔
ایلو کنڈ آن ضلع کیچ ئنا علاقہ زامران ئٹی پاکستانی لشکر نا کاروان ئٹی ساڑی گاڑی ئسے بمب جلہو ئٹ ٹک کننگانے۔
جہی حوال تا رد ئٹ تراک ئٹی پاکستانی لشکر ئے نسخان تون مون تروئی تمانے واہم کوالخواک دائسکان دا رد ئٹ ہچو شابیت حوال مونا ہتنو۔
پن کروک ہڑتُما علاقہ غاتیٹ بلوچ سلاہ بند آجوئی خواہوک تنظیم آک متحرک ءُ ہرا جتا نوعیت نا جلہو تیٹ پاکستانی لشکر ئے ٹک کیرہ۔ واہم دا تومکا جلہو تا ذمہ واری ئے دائسکان کس ئس ہرفتنے۔
