اینو بلوچ آجوئی خواہوک راہشون واحد کمبر نا زوراکی ئٹ بیگواہی نا کیس ئے جسٹس روزی خان و جسٹس شوکت علی رکشانی نا عدالت ئٹی خلنگ مس ہراڑے جج آک استاد واحد کمبر نا زوراکی ئٹ بیگواہی نا حوالہ ئٹ کیس ئے بنگُر۔
کاروائی نا وخت آ جسٹس شوکت رکشانی اسسٹنٹ اٹارنی جنرل ئے سختی ئٹ پارے کہ واحد کمبر بلوچ ئے عدالت نا مونا ہتنگ مرے یا اونا ساڑی مننگ نا حوالہ ئٹ رپورٹ جمع کننگ مرے۔
اندا وخت جسٹس روزی خان ہم بنجائی حکومت نا نمائندہ غاتِہ ایلو سماعت اسکان استاد واحد کمبر بلوچ نا پاکستان ئٹی ہتنگ یا دزگیری ٹی مروکا تینا رپورٹ ئے تننگ نا ہدایت کریر۔
یات مرے کہ بزرگ بلوچ آجوئی خواہوک راہشون ہنوکا سال ایران آن زوراکی ئٹ بیگواہ کننگاسس ہراڑے کیہی تپہ غاک اونا دزگیری نا حوال ئے پک کریسُر کہ واحد کمبرئے ایران آن پاکستانی ڈکھکوک ایجنسیک بیگواہ کرسا پاکستان آ درینو۔
واحد کمبر نا مسڑ مہلب بلوچ تینا باواہ نا زوراکی ئٹ بیگواہی نا بابت ئٹ پارے کہ ننا باوہ پاکستانی لشکر نا دزگیر ئٹی ءِ۔
