شال آن پاکستانی لشکر نا دو آن زوراکی ئٹ بیگواہ کننگوک قلات نا جہی فہیم و خادم حسین نا خاہوت اوفتا آجو مفننگ آ دوارہ منگچر نا جہہ آ کوئٹہ کراچی بنجائی کسر ئے اسہ وار پدا بند کرینے۔
خاہوت نا پاننگ ءِ کہ ضلعی انتظامیہ بیگواہ فہیم و خادم حسین نا آجوئی کن ہرا معاہدہ ئے کریسس اوڑا عمل کتنے۔
مُسہ دے مُست فہیم و خادم حسین نا خاہوت ضلعی انتظامیہ تون معاہدہ آن پد بنجائی دگ آ برانز ئے ایسر کریسس۔
فہیم احمد و خادم بلوچ ہڑتُما انٹرمیڈیٹ نا خوانندہ اسر ہرافتِہ سمنگلی روڈ آ جناح ٹاؤن آن نن نیمہ غا زوراکی ئٹ بیگواہ کننگاسس۔
ایلو کنڈ آن پنجگور آن پاکستانی لشکر اسہ بندغ ئس دزگیر کننگ آن گڈ بیگواہ کرینے۔
خاہوت نا رد ئٹ نگور پنجگور نا جہی محمد ولی نا مار سمیر ئے روچئی آن مُست یاسین مارکیٹ آن زوراکی ئٹ بیگواہ کننگانے۔
اوفتا پاننگ ءِ کہ سمیر بارڈر آ کاریم کریکہ ہراڑے او تینا گاڑی چلفیکہ۔ خاہوت اونا سرسلامت آجوئی نا خواست کرینے۔
