پاکستانی لشکر بلوچستان نا بنجائی شار شال ئنا سول اسپتال ئٹی 23 ئنا کچ جون ہیسُنے ہرافتِہ مونتس تیٹ خلنگ نا دعوی کننگانے۔
پاکستانی لشکری کوالخواک دا رد ئٹ شابیت حوال تتنو کہ دا بندغ آتِہ اراڑے خلنگ مسنے و جتا سیکورٹی ذرائع تا دعویٰ ءِ کہ پن کروک جونک بولان آپریشن ئٹی خلنگ مروک بندغ آتا ءُ۔
ایلو کنڈ آن زوراکی نا بیگواہی تا برخلاف جہد کروک تنظیم وائس فار بلوچ مسنگ پرسنز کوئٹہ سول اسپتال ئٹی جون تا ساڑی مننگ ئے پک کرینے۔
وائس فار بلوچ مسنگ پرسنز نا رد ئٹ پاکستانی لشکر درو 23 جشوک جون سول اسپتال کوئٹہ ٹی ہیسُنے و اوفتا دعوی ءِ کہ دا مونتس ئٹ خلنگانو ولے ننے خلیس ءِ کہ دا جونک زوراکی ئٹ بیگواہ کننگوک بندغ آتا ہم مننگ کیرہ۔
خیال ئٹ مرے کہ بلوچستان ئٹی دنو کیہی تدینی مونا بسنے کہ پاکستانی لشکر دروغ ئنا مونتس تیٹ مُست آن دزگیر کروک بندغ آتِہ کھسفِسہ مونتس نا پن تسنے ہرافتا چائنداری پدان زوراکی ئٹ بیگواہ کننگوک بندغ آتا رد ئٹ مسُنے۔
تنظیم بلوچستان آن زوراکی ئٹ بیگواہ کننگوک بندغ آتا خاہوت آتیان خواست کرینے کہ او جون تِہ ہُننگ کن سول اسپتال کوئٹہ غا الم کار۔
