بلوچستان نا ضلع نوشکی آن پاکستانی لشکر نا دو آن بیگواہ کننگوک 11 بندغ نا چاہنداری مسنے ہرافتیٹ اسکول نا خوانندہ ہم اوار ءِ۔
بلوچ یکجہتی کمیٹی شابیت حوال تِہ ترِسہ پارینے کہ 16 مارچ آ سہب ئنا 10 بجہ نا وختا اسٹیشن و اونا ہیب ئہ کھیب آن پاکستانی لشکر مُسہ چُنک سن مار، ڈرائیور، مزور و کسری تیتون اوار کیہی بندغ زوراکی ئٹ بیگواہ کرے۔
زوراکی ئٹ بیگواہ کننگوک بندغ آ تیٹ ششمی جماعت نا خوانندہ 14 سالی لیاقت ولد عبد الخالق، غریب آباد نا جہی محمد حیات نا مار عدنان ہرا نا سن 14 سال و ششمی جماعت نا خوانندہ ئس ءِ، غریب آباد نوشکی نا جہی امیر احمد نا مار ضیاء الرحمن ہرا نا سن 15 سال و ہفتمی جماعت نا خوانندہ ئس ءِ، زور آباد نوشکی نا جہی حاجی محمد حسن نا مار محمد عثمان بلوچ، چاغی نا جہی محمد داؤد نا مار زبیر احمد، چاغی نا جہی زرین العابدین نا مار عطاء الرحمن، پدگ چاغی نا جہی کرم شاہ نا مار عمر شاہ، پدگ چاغی نا جہی شیردل خان نا مار طاہر خان، پدگ چاغی نا جہی حامد خان نا مار حافظ شکور، قلات نا جہی جلیل احمد،کوئٹہ نا جہی ثناء اللہ اوار ءُ۔
بی وائ سی نا رد ئٹ دا لڑ آن بیدس ہم کیہی بندغ آک بیگواہ کننگانو۔
بیان ئٹ پاننگا کہ چنک سن چنا تِہ و بے ڈوہ آ بندغ آتِہ زوراکی ئٹ بیگواہ کننگ بندغی حق آتا لتاڑ ءِ۔ بلوچستان ئٹ بندغی حق آتا لتاڑ آ جہانی بندغی حق آتا ادارہ غاتِہ سوبری ئٹ پام تننگ بکار ءِ۔
