منگچر نا علاقہ خالق آباد ئٹ بنجائی کسر آ، بیگواہ کننگوک فہیم احمد و خادم علی نا خاہوت آتا برانز اینو ارٹمیکو دے ہم برجاء ءِ۔
اینو ایڈیشنل ڈپٹی کمشنرریونیو شاہنواز بلوچ نا کماشی ٹی اسسٹنٹ کمشنر منگچر ڈاکٹرعلی گل عمرانی، اسسٹنٹ کمشنرقلات آفتاب احمدلاسی، SHO قلات لیویز جان محمدلانگو، ایڈیشنل SHO عبدالکریم مینگل، SHO منگچر علی اصغر نیچاری و ایلو برانزی تتون گپ تران کرسا برانز ئے ایسر کننگ کن بسر ولے اوفتتون گپ تران بےسوب مس و برانز دائسکان برجاء ءِ۔
بلوچ یکجہتی کمیٹی سراوان ہنکین نا پارہ غان پاننگانے کہ منگچر برانز ئٹ خاہوت آک دا یخ و چِرک ئٹ، بے سہور آن خونی آ کسر آ تولوُک ءُ۔ برانز ئٹ چنا نیاڑی و کماش آک بے گواہ کننگوک سنگت آتا آجوئی کن خن کسر آ ہروک۔
بی وائے سی نا کنڈ آن پاننگا کہ انتظامیہ تون ہر وار مزاکرات بےسوب مرِسہ ءِ، خاہوت آتا پاننگ ءِ کہ ہراتم اسکان کہ اوفتا بےگواہ غا ورنا تِہ اوفتا دوٹی تتنو، اوفک کسر آ تولوک مرور و برانز برجاء مرو۔
خیال ئٹ مرے ملخدو ننکان جناح ٹاؤن آن محمد فہیم ولد سعید احمد و خادم حسین ولد علی احمد ئے نیچاری آن بیگواہ کننگاسس۔
اوفتا آجوئی کن برانز برجاء اسک کہ درو سلاہ بند بندغ آک سادہ پُچ آتیٹی قدرت اللہ ولد علی احمد نیچاری ئے زورانسری تینتون دریر و بیدادی آن گڈ یلہ کریر۔
