بلوچ لبریشن آرمی نا ترجمان جیئند بلوچ تینا شنگ کروک بیان ئٹی پارے کہ بی ایل اے پاکستانی لشکر نا جنگی قیدی تا بدل ئٹ بلوچ بندی تہ آجو کننگ کن 48 ساہت نا وخت تسس، ہراکہ کوزہ گیر لشکر کن اونا کارندہ غاتا زند ئے بچفنگ نا ایسری وارخواہی اسک۔ واہم، پاکستان تینا دودی آ ضد و لشکری غرور نا درشانی کرِسہ نہ بیرہ سوبر گپ و تران آن پد سلیس بلکہ زمینی گواچن آتیان ہم خن ڈھکا۔ پاکستانی لشکر نا ہندا ہٹ دھرمی نا سوب آن کُل 214 بندی کننگوک کارندہ غاتہ مرگ ئنا گواچی کننگا۔
او پارے کہ بی ایل اے ساندہ جنگی اصول و جہانی قانود آتا ردئٹ کاروائی کرینے، ولے پاکستانی ریاست تینا کارندہ غاتا زندہ آتہ بچفنگ نا بدل آ اوفتہ جنگی ایندھن نا وڑ کارمرز کرینے۔ دا ہٹ دھرمی نا نہاد دشمن ئے 214 کارندہ غاتا مرگ ئنا دروشم ئٹ تروئی تما۔
اونا پاننگ اس کہ بی ایل اے دا جھڑپ ئٹی تینا 12 سرمچار آتا شہیدی ئے خیسنو دروت ندر کیک۔ ہرا دشمن نا برخلاف استان دننگ مفروکو قربانی تسر۔ چھار شمبے نا دے 3 سرمچار، وخت ئسکہ تدوکا نن 4 پین سرمچار دشمن تون جنگ کرِسہ شہید مسُر۔ دا شہید آتیٹی 5 مجید برگیڈ نا جند ندر آک اوار ءُ، ہراکہ تینا ساہ تہ ندر کرِسہ دشمن ئے ہندنو شکست ئس تسر کہ ہرادے دیہاڑ ساندہ یات تخو۔
ترجمان پارے کہ آپریشن درہ بولان نا جنگ ئٹ جند ندر آک دشمن ئے اسہ تباہ کُن جال ئسیٹ گھٹ کرِسہ کاری ضرب خلکر۔
ترجمان ودیک پارے کہ جند ندر آک منہ بندی کننگوک فوجی تہ خاص بوگی تیٹی بند کرسا پوزیشن ہلکُر و ایلو بندی تہ سرمچارک تینا رکھکوک ٹھکانہ تیا دننگ ئٹ سرسوب مسُر وختس کہ پاکستانی ایس ایس جی کمانڈو تہ ضرار کمپنی جعفر ایکسپریس نا بوگی تیٹی بند انگا قیدی تہ ریسکیو کن سر مس، گُڑا جند ندر آک اوفتہ گھیرہ کرسا اوفتا سخت جلہو کریر۔ کیہی گھنٹہ اسکان برجاء دا جنگ ئٹی ایس ایس جی کمانڈو تِہ بھاز جانی نسخان رسینگا و قیدی تِہ ہم خلنگا۔ جند ندر آک گُڈیکو سُم اسکان جنگ ترسا دشمن ئے فیصلہ کن نسخان تسُر و تینا گُڈیکو سُم ئے تینے خلِسہ شہیدی نا ہند ئے دوئی مسر۔
اونا پاننگ اس کہ داسا کوزہ گیر لشکر اندا جند ندر آتا جون تہ تینا سرسوبی نا دروشم ئٹ نشان تننگ نا بےسوب کوشست کننگ ءِ، ہرافتا مشن پدا زندہ بننگ نا جاگہ گُڈیکو دم اسکان جنگ اسک۔ فوج تینا لشکر و اٹیلیجنس آن پد ہم بندی تہ رکھنگ ئٹی بےسوب مس۔ ایلو ہرا بندغ آتہ پاکستانی لشکر “ریسکیو مروکو” نشان تننگ ءِ او کُل بندغ آتہ اولی دے بی ایل اے جنگی اصول آتا رد ئٹ رکھکوک کسر ترسا یلہ کریسس۔
او پارے کہ دا جنگ دائسکان ایسر متنے بلکہ گیشتر مسنے۔ بلوچ سرمچارک جتا ہند آتیٹ سنگر ہلِسہ کوزہ گیر لشکر ئے ٹک کننگ ءُ و دشمن دائسکان تینا خلنگ مروکا کارندہ غا تا جون تہ ہرفنگ ئٹ بےسوب ءِ۔ ہر ہنوکا ساہت ئٹ بی ایل اے نا دیمرئی پاش مننگ ءِ۔
او ایسر ئٹ پارے کہ بلوچ لبریشن آرمی درہ بولان نا رد ئٹ شابیتی حوال تہ آپریشن نا ایسر مننگ آن پد میڈیا ٹی شنگ کرو۔ دائسکان جنگ برجاء ءِ۔
