اوغان طالبان نا حکومت بلوچستان ئٹی جعفر ایکسپریس آ جلہو ئے اوغانستان تون گھنڈنگ نا پاکستانی دوبہ آتہ شیف خلِسہ پارے کہ پاکستان ئے بے بنیاد دوبہ خلنگ نا جاگہ غا تینا سلامتی و تہہ ئنا ویل آتیا پام تننگ نا گرج ءِ۔
اوغان وزارتِ خارجہ نا ترجمان عبدالقہار بلخی چاگڑدی حوالکاری تلہ ’ایکس’ آ شنگ کروک تینا بیان ئٹی پارے کہ بلوچ مزاحمت ئٹی اوار ہچو بندغ ئس اوغانستان ئٹی ساڑی اف، و نئے طالبان حکومت نا اوفتتون تعلقداری ارے۔
او پارے کہ طالبان حکومت ئے دا تدینی ٹی زیان مروک ساہ تیا افسوس ءِ، و سیاسی مسخت آتیکن شاری تا ساہ تہ ہلنگ بلاجواز ءِ۔
خیال ئٹ مرے کہ پاکستانی لشکر نا ترجمان آئی ایس پی آر دعویٰ کریسس کہ جعفر ایکسپریس آ جلہو اوغانستان ئٹی ساڑی عسکریت پسند آتا سروک آتا پنت آ کننگاسس، ہرا جلہوکار تتون تینٹ رابطہ ٹی اسر۔
پاکستان نا دفتر خارجہ ہم پاریسس کہ جلہوکار تا فون تہ ٹریس کننگانے و ننتو ثبوت ارے کہ اوفتہ اوغانستان آن پنت تننگ مننگ ءِ۔
