فوکس ایشیاء فاؤنڈیشن (FAF) وائس فار بلوچ مسنگ پرسنز نا وائس چیرمین ماما قدیر بلوچ ئے نرینہ غا تیٹی و نرگس بلوچ (حوران بلوچ) ئے زالبول آتیٹی نیلسن منڈیلا داد 2025 ئکن پن کرے۔
پن کروک ادارہ نا رِد ئٹ دا اقوام متحدہ نا اسہ خاصو داد ئس ءِ و ہمو بندغ آتیکن ءِ ہرا بندغی حق، چاگڑدی انصاف و ایمنی کن کاریم کننگ ءُ۔
ماما قدیر و نرگس بلوچ پانزدہ سال آن زوراکی نا بیگواہی و بندغی حق آتا لتاڑ نا برخلاف جہد کننگ ءُ و اوفتا جہد نہ بیرہ زوراکی ئٹ بیگواہ کننگوک بندغ آتا خاہوت آتا توار ءِ بلکہ داڑان جہانی تیبر آ اسہ اہمو ویل ئسے آ پام تننگ ئٹ کمک مسنے۔
ماما قدیر و وی بی ایم پی دا حوال ئے پک کرینو۔
چھار شمبے نا دے ماما قدیر بلوچ تینا ہڑدیئی بیان ئٹی پارے کہ بلوچستان زوراکی نا آسیاب نا گواچی ءِ و ہڑدے حالت آک بدتر مننگ ءُ۔ فروری نا تو ئٹی زوراکی ئٹ بیگواہی نا تدینی، بیدس عدالت کھسفنگ ئٹی ودکی مسنے۔ اندن میڈیا گواچن آتا پڑدہ شاغِسہ دروغ تالان کننگ ءِ۔
او دا تینا دا خیال آتا درشانی ئے زوراکی نا بیگواہی تا برخلاف برجاء وائس فار بلوچ مسنگ پرسنز نا بین برانزی گدان آ بروک بندغ آتتون کرے, برجاء گدان ئے چھار شمبے 12 مارچ 2025 آ 5758 دے پورو مس۔
دا وختا گدان آ خضدار آن سیاسی و چاگڑدی کاریم کروک امیر بخش بلوچ، اللہ بخش بلوچ، الٰہی بخش بلوچ و ایلوفک خاہوت آتون اواری نا درشانی کن بسوسر۔
