درو بی ایل اے نا پارہ غان جعفر ایکسپریس ئے کوزہ کننگ آن گڈ کیہی زالبول، چنا و پیر انگا تہ یلہ کننگاسس ہرا استو کوئٹہ ئے سر مسر۔ یلہ مروک آک میڈیا تون ہیت کرسہ پاریر کہ اوفک تدینی نا وخت قیامت آن بارو حالیت ئسے آن گدرینگار۔ او پاریر کہ جلہوکارک ننے اِلار و نن تینا ساہ تہ کشان بسون۔
برطانوی حوال شینک کروک ادارہ بی بی سی اردو نا ردئٹ 80 نا کچ بندیک یلہ مسنو ہرافتیٹ گیشتر زالبول، چنا و پیر انگاک اوار ءُ۔
یلہ مروک بندیک بی بی سی تون ہیت کرسہ تدینی نا بارو ئٹ پاریر کہ جلہو اسہ ترند تراک ئسیٹ بناء مس و اسہ گھنٹہ ئس سم کاری نا لڑ برجاء مس ہموتم سلاہ بند بندغ آک ریل ئنا بوگی ٹی پیہسہ بندغ آتا چاہنداری ئے بنا کریر۔
یلہ مروک مشتاق احمد پنیئو بندغ ئس بی بی سی ئے پارے کہ ننا بوگی تا در آتیا مُسہ مُسہ سلاہ بند بندغ گھاٹ تننگ اسر، اوفک بندغ آتہ پاریر کہ او شاری، زالبول، چنا، پیر انگا و بلوچ آتہ ہچ پاروفس۔
اونا پاننگ اس کہ اوفک تین پہ تین بلوچی ئٹ ہیت کننگ اسر و اوفتا سروک اوفتہ وار وار پارسہ اس کہ سکیورٹی کارندہ غاتیا خاص نظر تخرے دافک دو آن پیشتمپس۔
اسہ پین اسحاق نور پنیئو بندغ ئس تدینی نا بارو ئٹ ہیت کرسہ پارینے کہ اوفک ننا بوگی آن کنا خیال کم آن کم یانزدہ بندغ شیف دڑفیر و پاریر کہ دا سکیورٹی کارندہ ءُ، دا وخت آ اسہ بندغ ئس مزاحمت کننگ نا کوشست کرے گڑا اوڑا بیدادی کرسہ شیف دڑفیر و پدا سم تا توار بس اوڑان پد بوگی ٹی ساڑی غٹ بندغ آک جلہوکار آتا پنت آتیا عمل کرسہ کریر۔
اسحاق نور ئنا پاننگ اس کہ بیگہ نا وخت آ اوفک پاریر کہ نن بلوچ، زالبول، چنا و پیر انگا تہ یلہ کننگ اُن او کنے اِلنگ الور ولے ہراتم اوفتہ پاریٹ کہ ای تربت نا ہندی ئسے اُٹ و کنتون چنا نیاڑیک اوار ءُ گڑا اوفک کنے ہم الار۔
یلہ مروک مسٹمیکو بندی محمد اشرف بی بی سی ئے پارے کہ سلاہ بند بندغ آک پیر انگا تہ، لس شاری، زالبول و چنا تہ اِلار و اوفتا پنیر اسٹیشن کن مرغنا پند آ سفر بیگہ نا وخت آ بناء مس۔
او پارے کہ نن پنیر اسٹیشن اسکان مُسٹ آن مُسہ نیم گھنٹہ ٹی بھاز سختی ئٹ سر مسون، انتیکہ دم دری ہم اس و ورنا غا مسنک، زالبول، چنا و پیر انگاک ہم اسر۔
بی بی سی نا صحافی ئسے تون ہیت کرسا محمد اشرف پارے کہ بھازی بندغ آک تینا مڈی تہ اِلسہ بسوسر، اندن گڑاس تینا مڈی تہ ہتنگ اسر، ہراڑا ای اوفتہ پاریٹ کہ داڑے تینا ساہ ئے رکھنگ سخت مننگ ءِ، منہ پیرو بندغ اسر ہرافتہ نن تینا کوپہ غا تیا ارفین و خلسہ پرغسہ داڑاسکان سر مسون۔
او پارے کہ مسافرک بھاز خُلینگ اسر، قیامت نا ندارہ اس۔
اندا وڑ بہاولپور آ ہنوک مسافر بشیر تینا زائیفہ و اِرا چنا تون سفر کننگ اس، او بی بی سی ئے پارے کہ سلاہ بند بندغ آک بسر و ننے پاریر کہ نم شیف دڑنگبو، اوفک نہ کنے توریر و نئے کنا چنا تہ۔
سلاہ بند بندغ آک ننے پاریر کہ نم پدی چک خلپیرے اوکان پد نن سخت انگا کسر تیٹ پند خلسہ ریلوے اسٹیشن ئے سر مسون۔
