بلوچستان نا جہہ نصیرآباد، جعفر آباد و سندھ ئنا شار تیان پاکستانی لشکر 3 بندغ زوراکی ئٹ بیگواہی نا گواچی کرینے۔
درے نن نصیر آباد و جعفرآباد نا جہہ تیٹ پاکستانی لشکر اُرا تیا ارش کرسہ اِرا بے ڈوہ بلوچ ورنا زوراکی ئٹ بیگواہ کرینے۔
جہی حوالکار تا پاننگ ءِ کہ پاکستانی لشکر جعفر آباد نا جہہ صحبت پور ئٹ اسہ اُرا ئسے آ جلہو کرِسہ گہوار بگٹی نا مار جوانسال ئے زوراکی ئٹ بیگواہ کرینے۔ اندن نصیر آباد نا جہہ روجھان جمالی ٹی حبیب کوہلی بگٹی نا مار کولمیر ئے ہم اون اراغان بے قانودی دزگیر کرِسہ زوراکی ئٹ بیگواہ کننگانے۔
اندن پاکستان نا صوبہ سندھ ئنا شار کراچی آن پاکستانی لشکر اسہ اسپتال ئسے آن سرفراز ولد نواز پنیئو ورنا ئسے 27 فروری نا نن بے قانودی دزگیر کننگ آن پد زوراکی ئٹ بیگواہ کرینے۔
پاننگک کہ پن کروک ورنا ناجوڑ مسنے و اسپتال ئٹ ورنا نا علاج مننگ مسنے۔ دزگیری آن گڈ دائسکان اونا ہچو حوال اف۔
زیمی خاہوت نا خواست ءِ کہ سرفراز بلوچ ئے زوت پھاش کیر اگہ اوڑا دوبہ ارے اودے عدالت ئٹ ہتیر، یا زوت آجو کیر۔
