بلوچ نیشنل موومنٹ نا بیگواہ غا راہشون عبدالغفور بلوچ نا لمّہ اونا مرغنا جتائی نا غم ئٹ دو شمبے نا دے، 5 مارچ 2025 آ دنیا ئے الّا۔
بی این ایم نا مسکوئی بنجائی کمیٹی نا باسک عبدالغفور بلوچ ئے 26 دسمبر 2009 آ پاکستانی لشکر دزگیر کننگ آن گڈ بیگواہ کرے۔
بی این ایم نا ترجمان تینا بیان ئٹی پارینے کہ تنظیم بیگواہ غا راہشون نا لمّہ نا دنیا آن موکل کننگ آ ڈکھ ئنا درشانی کیک و خاہوت نا دڑد ئٹی سلوک ءِ۔ عبدالغفور نا لمّہ نا دنیا آن رخصتی بلوچستان نا ہزار آ زور ئٹ بیگواہ کننگوک بندغ آتا باوہ لمّہ نا اسٹ آ غم ئنا داستان ءِ، ہرا تینا بندغ آتا انتظار ئٹ دنیا غان ہنانُو۔ عبدالغفور بلوچ ہنوکا پانزدہ سال آن پاکستانی لشکر نا نادرست آ سزا جاہ تیٹ بند کننگانے۔
ترجمان نا پاننگ اس کہ عبدالغفور ئے ارٹمیکو وار دسمبر 2009 ئٹی زورئٹ بیگواہ کننگا، او داسکان زندان ئٹی ءِ۔ داکان مُست ہم او زورئٹ بیگواہ کننگاسس ولے لٹ کُٹ آن پد ہم تینا جہد ئے الّیتو۔ بی این ایم تون خڑکی و راجی آجوئی نا جہد ئنا سوب آن اودے ہنوکا شانزدہ سال آن بندی کننگانے و اونا زند ئنا بارو ئٹ ہچو حوال رسینگتنے۔
بی این ایم نا ترجمان نا ودیک پاننگ اس کہ بی این ایم، بلوچ راج آ برجا ریاستی زوراکی ئے سوگوا ثبوت آتا وسپہ ئٹ جہانی ادارہ آتا مون آ تخسہ کرو۔ عبدالغفور بلوچ، ڈاکٹر دین محمد، رمضان بلوچ، حاصل حسرت و بی این ایم نا ہمو بیگواہ غا باسک آک ہرا سال آتان ہزار آ بیگواہ بلوچ آتیٹ اوار ءُ۔ پاکستان زور ئنا بیگواہی ئے اسہ جنگی سِلاہ ئسے نا وڑ ئٹ بلوچ راج ئنا برخلاف کاریم ئٹی ہتنگنگ ئٹی ء تاکہ اودے آجوئی نا جہد آن مُر کننگ مرے۔
