بلوچ نیشنل موومنٹ نا چیئرمین ڈاکٹر نسیم بلوچ پارینے کہ کردگاپ ئٹی تدوکا منہ دے آن زوراکی ئٹ بیگواہ کننگوک بندغ آتا خاہوت آک و علاقہ نا الس شال، تفتان دگ آ تولوک برانز کننگ ءُ۔ اوفتا بندغ آک ریاستی لشکر نا دو آن زوراکی ئٹ بیگواہ کننگانو و اوفک انصاف نا گنار ئٹ تولوک ءُ۔
ڈاکٹر نسیم بلوچ پارے کہ کردگاپ آن تعلقداری تخوک سرپرہ قبیلہ نا کاروباری شخصیت آک، سرکاری ملازم آک و خوانندہ غا تون اوار دہ بندغ جتا وخت ئٹ بلوچستان نا جتا علاقہ غا تیان پاکستانی لشکر دزگیر کننگ آن گڈ بیگواہ کرینے ہرافتیٹ عبدالمالک سرپرہ ہم اوار ءِ ہرا نوشکی نا جہی ئس ءِ و کراٹہ ٹی بلیک بیلٹ دوئی کرینے۔ اودے 25 اگست 2011 آ کراٹے کلب آن زوراکی ئٹ ہرفِسہ بیگواہ کننگانے۔ اندن غلام فاروق سرپرہ، ہرا ڈیرہ مراد جمالی آن تعلق تخک و تینا خاہوت نا اسٹ انگا کھٹیا کروک اس، 2 جون 2015 آ بیگواہ کننگانے۔ جمیل احمد سرپرہ، ہرا بلوچستان حکومت ئٹی گورنر نا پی آر او نا حیثیت ئٹ کاریم کننگ اس، 25 جولائی 2015 آ کوئٹہ گرین ٹاؤن سریاب ئٹی تینا اُراغان پاکستانی لشکر نا دو آن زوراکی ئٹ بیگواہ کننگانے۔ کردگاپ آن تعلق تخوک میر تاج محمد سرپرہ پنیئو اسہ پین کاروباری شخصیت ئس، 19 جولائی 2020 آ کراچی بالی پٹ (ایئرپورٹ) آ ہِننگ نا وختا کسر آن بیگواہ کننگانے۔ اونا بارو ئٹ ہموزدے آن اینو اسکان ہچو معلومداری رسینگتنے۔ اندا وڑ اِرا ایلم، راشد سرپرہ و ذاکر سرپرہ ئے ہم ڈھکوک ایجنسیک زوراکی ئٹ بیگواہ کرینو۔ راشد ئے 18 دسمبر 2021 و ذاکر ئے 30 اگست 2021 آ پاکستانی لشکر دزگیر کریسس ہراکان گڈ اوفتا ہچ ڈس اف۔
او پارے کہ سرپرہ خاہوت آن ظہور سرپرہ و سجاد سرپرہ، ہرا سیالی ٹی اِلہ مڷ ءُ، مئی 2021 و جولائی 2021 ئٹی کوئٹہ آن زوراکی ئٹ بیگواہ کننگانو۔ اوفتا خاہوت تدوکا کیہی سال آن برانز کننگ ءِ، داکان ویتہ، لاء کالج نا خوانندہ جاوید شمس ئے 31 اگست 2021 آ کوئٹہ ٹی اونا اُراغان پاکستانی لشکر بیگواہ کرینے ہموکان پد دائسکان اونا ہچ ڈس اف۔ شاہنواز سرپرہ نا تعلق ہم کردگاپ آن ءِ، ہرادے 2024 ئٹی قلات نا علاقہ منگچر آن زوراکی ئٹ بیگواہ کننگانے۔
ڈاکٹر نسیم بلوچ پارے کہ بلوچستان ئٹی پاکستانی لشکر نا دو آن دزگیری آن گڈ زوراکی ئٹ بیگواہ کننگ ہمو ٹپ ءِ، ہرا نا دڑد اسہ دے جہانی ضمیر ئے الم ٹوہنگ آ بیوس کرو۔ ہرا بندغ آک دا دڑد ئنا گواچی ءُ، بیرہ ہمو پہہ مننگ کیرہ کہ زوراکی ئٹ بیگواہ کننگوک آتا باوہ لمہ و سیال آک اَرا اذیت آن گدرینگ ئٹی ءُ۔ اخس باوہ لمہ و سیال عزیر آک کیہی سال تیان تینا بندغ آتا گنار ئٹ کسر آ خن خلوک دا جہان آن رخصت مسر، ولے اوفتہ گڈیکو وار خننگ نا است خواہی تون ساہ تروئی تما۔
چئیرمین پارے کہ کردگاپ تولوک برانز، بلوچستان ئٹی برجاء ظلم و زوراکی تا بیرہ اسہ مون پھاشی ئس ءِ۔ بیگواہ غا بندغ آتا خاہوت آک تینا بندغ آتا آجوئی کن دے و نن کسر تیا تولوک ءُ، انصاف نا خواستگار خاہوت آک یخ ئٹ ہم تولوک برانز ئٹ ساڑی ءُ ولے انصاف تننگ نا جہہ آ اوفتا توار ئے توننگ نا کوشست کننگ مننگ ءِ۔ نہ بیرہ اوفتہ نظر انداز کننگک بلکہ انتظامیہ نا کنڈ آن دڑکو ترسا خلیفنگ نا کوشست ہم کننگ مننگ ءِ۔ جہی انتظامیہ ئے سرپند مروئی ءِ کہ پنجابی کوزہ گیر و پھاش دشمن ءِ ولے او اندا سرزمین نا بھاتی ءُ۔ اوفتہ سوچنگ بکار ءِ کہ او بلوچ الس ئنا برخلاف ظلم ئٹی تینا بشخ ئے شاغِسہ دیہاڑ ئٹ بامُس تھڑی نا گواچی مفس انتئے کہ ظلم ئنا ڈوہ ئٹ شریک ئے آخر السی غیض و غضب تون مون تروئی تمک۔
ڈاکٹر نسیم بلوچ پارے کہ بلوچ نیشنل موومنٹ سرپند مریک کہ زوراکی نا بیگواہیک ریاستی پالیسی نا اسہ بشخ ئسے اُر، و ریاست ہی دا ظلم ئنا ذمہ وار ءِ، بلوچ الس تدوکا کیہئ دہک آن اندا ریاستی زوراکی نا بر خلاف مزاحمت کننگ ءِ و دا جہد ہچو خواست یا درخواست ئسے نا آہری اف، بلکہ دا اسہ دیہاڑی گواچن ئس ءِ کہ دیک حساب مریرہ ولے مزاحمت ساندہ سلک۔
