"بلوچستان ئٹی زوراکی ئٹ بیگواہ کننگ تینا ایسری سیم آٹے۔ بی این ایم نا بندغی حق آتا ادارہ پانک ئنا رپورٹ نا رد ئٹ دا تو ئنا 5 دے ئٹی 48 بندغ زوراکی ئٹ بیگواہ کننگانو ہرافتان 35 بندغ ئے پاکستان نا فوج قلات آن دزگیر کننگ آن پد بیگواہ کرینے، ہندن 5 بندغ ئے زندان ئٹی کھسفنگانے۔”
دا ہیت ئے بلوچستان نیشنل موومنٹ نا جارکش تینا بیان ئٹی کرے۔ او بلوچستان ئٹی بندغی حق آتا خراب انگا حالیت آ فریشانی نا درشانی ئے کرسہ پارے کہ زوراکی نا بیگواہی تا شابیت حوال اسہ بیان ئسے ٹی مونا ہتنگ مفک۔ نن جہان نا بندغی حق آتا ادارہ آتان خواست کینہ کہ او بی این ایم نا بندغی حق آتا ادارہ پانک ئنا شنگ کروک رپورٹ آتا نظر شاغِر ہرا بلوچستان ئٹی بندغی حق آتا لتاڑ ئے پک انگا ذریعت آتیٹ رپورٹ کننگ ء۔ دا رپورٹ آک ظاہر کیرہ کہ بلوچستان اسہ بھلو بندغی بحران ئسے نا گواچی ء و بلوچ قوم نسل کشی تون مون تننگ ء۔
جارکش پارے کہ بلوچستان ئٹی ہزار آتا کچ بندغ آک زوراکی ئٹ بیگواہی نا گواچی مسنو ہرانا سوب آن تیوہ بلوچ قوم اذیت ء۔ بلوچ قوم ظلم و بیدادی تا برخلاف مدام توار بڑز کننگ ء ولہ ریاست نا بیدادی گھٹ مننگ نا جہہ آ ودھانے۔ نیاڑی و چناک ہراتم تینا دوستخواہ تیکن برانز کیرہ تو اوفتے بیدادی نا گواچی کننگِک و اوفتے بیگواہ کننگ نا کوشست کننگک تانکہ او دا برانز آن دو کشیر۔
او پارے کہ نن دا ظلم و بیدادی تا برخلاف ہچ بے توار مروفن۔ پاکستان بلوچ قوم ئنا آجوئی نا جنز ئنا سوب بلوچستان ئٹی تینا تاقت ئے گوہانے۔ ہندا سوب پاکستان تینا بے سوبی ئے ڈھکنگ کن الس ئے تینا ظلم ئے نشان تننگ ئٹی ء تاکہ خُلیس نا ذریعت ئٹ بلوچ قوم آ تینا کوزہ ئے سوگو کننگ کے۔ نن خبڑدار کینہ کہ بلوچ قوم آ زور شاغنگ گیشتر دتر وہنگ نا سوب مرو۔
بی این ایم نا جارکش پارے کہ بلوچ قوم تینا آزاتی آن اسہ گام ئس ہم پدی مروف، ہرا قربانیک تننگ مننگ ئٹی ءُ اوفتا خواست ء کہ تیبہ قوم اسہ جہہ آ مرسہ تینا راجی جنز ئے سوگو او وڑ ئسیٹ مونا دے۔ ہرا وخت اسکان بلوچ قوم غلام ء زوراکی نا بیگواہی و وے قانودی ئٹ کوش ئنا سلسلہ ایسر مروف۔
جارکش بی این ایم نا باسک آتہ پارے کہ او بلوچستان ئٹی زوراکی ئٹ بیگواہ کننگوک بندغ آ تا خاہوت آتتو اواری نا درشانی کرسہ اوفتا ہمت و حوصلہ ئے زیات کیر و بلوچ راج ئے اسٹ کیر۔ بی این ایم نا پیشن ملک آتیٹی رہینگوکا باسک آک بلوچ قوم ئنا توار مرسہ جہانی ضمیر ئے چھنڈیفر و آزات بلوچستان کن جہانی حمایت ئے گیشتر کننگ نا کوشست کیر۔
جارکش ایسر ئٹ پارے کہ دا تو ئٹی 27 مارچ آ بلوچستان آ پاکستان نا کوزہ نا برخلاف بی این ایم جتا مُچی تا ذریعت ئٹ زوراکی نا بیگواہی و وے قانودی ئٹ کھسفنگ نا واقعہ تہ جہان نا مونا ہتو۔ بنجاہی مُچی جنیوا ٹی مرو ہراڑے اسہ سوگو او مہم ئسے نا ذریعت ئٹ جہانی ادارہ آتہ بلوچستان ئٹی مروک ظلم و بیدادی تان سوھو کننگو۔
