بلوچستان ئٹ زوراکی نا بیگواہی تا لڑ برجاء، پین دوانزدہ بندغ زوراکی ئٹ بیگواہ کننگار۔
شابیتی حوال تا رد ئٹ 28 فروری نا نن پاکستانی لشکر نوشکی نا علاقہ کلی جمالدینی آن اکبر جمالدینی نا عدنان و ابرار پنیئو اِرا مار دزگير کننگ آن گڈ بیگواہ کرینے۔
اندن بلوچستان نا بنجائی شار شال آن اسہ خوانندہ ئس و آواران نا تحصیل مشکے نا جتا علاقہ آتیان پاکستانی لشکر 9 بندغ زوراکی ئٹ بیگواہ کرینے۔
بیگواہ کننگوک بندغ آک مومن ولد اسلم، کامران ولد محمد عالم، معراج ولد نیاز محمد، زھیر ولد نیاز محمد شریکی مشکے نا جہی، سیف ولد کامریڈ لطیف میوار نا جہی، صفدر ولد عنایت نوکجو مَشکے نا جہی، قمرالدین ولد دوستین، وشدل ولد قادر داد، دوستین ولد قادر داد تراتدان مشکے نا جہی نا پن تیٹ درست مسنے۔
پاننگک کہ پن کروک 9 بندغ ئے پاکستانی لشکر تدوکا تو 28 فروری و یک مارچ آ جتا علاقہ تیا چھاپہ نا وختا دزگیر کرسا بیگواہ کننگانے۔
اندن ضلع لسبیلہ نا علاقہ وندر آن پاکستانی لشکر جھاو کورک چر چری نا جہی جمعہ خان نا مار الہی بخش ئے بیگواہ کرینے۔
جہی حوال تروکا تا پاننگ ءِ کہ پن کروک بندغ بھاز وخت آن جھاؤ آن داڑے بسنے و ہر بروکا دے پاکستانی لشکر نا لشکر کشی آن تنگ مرسا وندر آ بسس۔
یات مرے کہ برجاء سال ئنا جنوری آن ہلیس دائسکان دو سد نا کچ بندغ زوراکی ئٹ بیگواہ کننگانو۔
اندن تیبہ بلوچستان ئٹ دا وختا خاہوت آک تینا بندغ آتا آجوئی کن کسر تہ بند کرسا تولوک برانز کننگ ءُ۔
