بلوچستان نا بنجائی شار کوئٹہ آن پاکستانی لشکر و ڈھکوک ادارہ غاتا کارندہ غاک ارا بندغ زوراکی ئٹ بیگواہ کرینو۔ اندن آواران و مشکے آن پنچ بندغ زوراکی ئٹ بیگواہ کننگانے۔
کوئٹہ آن بیگواہ کننگوک ہڑتما بندغ آتا خاہوت کسر ئے بند کرسا برانز کننگ ء۔
کوئٹہ نا علاقہ ویسٹرن بائی پاس آن استو نن نیمہ غا پاکستانی لشکر و ڈھکوک ایجنسیک ٹکری بہادر کھیازئی و اونا ایلم علی رضا کھیازئی ئے زوراکی ئٹ بیگواہ کرینو۔
ہڑتما ایلم تا زوراکی نا بیگواہی تا برخلاف ویسٹرن بائی پاس کوئٹہ ئے خاہوت برانز کرسا بند کرینے۔
یات مرے ٹکری بہادر علی ئے داکان مست ہم زوراکی ئٹ بیگواہ کننگاسس۔
اندن ضلع آواران نا جتا جہہ تیان پنچ ورنا زوراکی ئٹ بیگواہ کننگانے۔
حوال تروک نا رِد ئٹ بیگواہ کننگوک ورناک گاجی خان نا مار عطااللہ، گاجی خان نا مار حبیب اللہ کاسم خان نا مار اعظم، کاسم بلوچ نا مار حفیظ و غلام جان نا مار جاوید بلوچ نا پنا درست مسنو۔
عطااللہ ملخدو ویگہ نا رھواٹ مشکے آن پاکستانی لشکر نا دو آن بیگواہ کننگانے و اونا ایلم حبیب اللہ ئے درو رھواٹ آن بیگواہ کننگانے۔
اندن اغظم خان و حفیظ بلوچ مشکے نا ہندی ء ہرافتہ درو پاکستانی لشکر آواران آن دزگیر کننگ آن پد بیگواہ کرینے۔
اندا وڑ غلام جان نا مار جاوید مشکے شُڑدوئی نا جہی ئس ء ہرادے مون نا دے زمین تا کاریم نا جاگہ غان بیگواہ کننگانے۔
