تحریر: سنگت بشام بلوچ
براہوئی مٹ: دیار زیب بلوچ
کنا سنگت سفر خان تون اولیکو اوڑدئی بولان نا مَش تیٹی مس۔ ای اودے ذاتی وڑ ئٹ درست کتوٹہ, ولے بلوچ راج ئنا آجوئی نا جنگ ننے اسٹ ایلو تو خڑک کرے۔ غلامی نا زند ئے النگ و سرمچار مننگ اسہ اڑزانو کاریم ئس اف، ولے سرمچار مننگ آن بیدس آجوئی نا پارہ غا پین ہچو کسر ہم اف۔
سرمچار و قوم اسٹ ایلو نا سہارہ جوڑ مرسہ آجوئی نا جنگ ئے کیرہ، سفر خان کون آ سنگت آک تینا زند ئے نَدر کرسہ تینا راج و سنگت آتے دا جنگ ئٹ بھروسہ بشخیرہ۔ ہرا شہید آک دا دنیا آن رخصت کیرہ کارہ، او تینا قوم و سرمچار آتیا امیت ئس تخرہ کہ او آجوئی اسکان دژمن ئے اسٹ اسٹ آ خلسہ تینا لمّہ وطن ئے آجو کرور۔ دا گوچنی ئس ء کہ بلوچ دژمن تون جنگ کرسہ کرو و تینا آجو مننگ اسکان دژمن ئے بےسُوب کرسہ کرو، ولے دا جنگ ئٹ گلاب نا پھل آک ننے آن جتا مرسہ کیرہ، او دا پھل آتا جتا مننگ نا دڑد ئے بیرہ اسہ لمّہ ئس و جنگ ئٹ ساڑی سرمچار ئس پہہ مننگ کیک۔
امو سرمچار، ہرا تینا مستقبل و ڈیہہ ئنا آجوئی کن جنوری نا یخ و جون جولائی نا باسنی ئے َسگک، تینا کسر نا ہر سختی و تکلیفی ئے خوئشی خوئشی سگسہ تینا آجوئی نا سفر ئے برجا تخک۔ آجوئی نا کسر ئٹ ہرا وخت پھل ئس شہید مریک، گڑا ہر اسہ سنگت نا اُست کپ مرسہ کائک، ولے او تینے تینٹ سوگو کیک۔ سرمچار آتا ملی ٹی دا ہیت مریک کہ اگہ نن ماندہ مسُن گڑا راج ئے حوصلہ دیر ایتو؟
دا جنگ ئے شہید آک بناء کرینو و نن دادے آجوئی یا کہ تینا شہادت اسکان سر کرون۔ شہید آتا دتر تا ہر پُڑی نا بیر ئے ہلوئی ءِ۔
ای سنگت سفر خان ئے بولان ئٹ اولی وار خناٹ۔ او چُپ اس، ای سوج کریٹ، ” امر اُس نی؟ "
ورندی تس، ” ای جوڑ اٹ سنگت نی بنف، نی امر اُس؟ "
ای پاریٹ، ای ہم جوڑ اٹ، ولے سنگت نی بنف نی چُپ و فریشان اس انتئے؟ ماسٹر سفر خان پارے کہ "سنگت ای فریشان افٹ، بس دژمن ئے خلنگ نا باروٹ سوچنگ اٹ۔”
منہ دے نن اوار مسُن، سفر خان نا مزاج کنے بھاز دوست بس۔ مدام ای اوڑتون توسٹہ و اونا ہیت آتے بننگُٹہ۔ او کنہ پارے، "سنگت اگہ دا جنگ ئٹ بسونُس گڑا وخت ئے تینا زیان اسُل ہم کپیس، ہر وخت دژمن نا برخلاف سوچس۔ تینا تاغت و وخت ئے دژمن ئے ایسر کننگ کن وقف کیس۔”
منہ وخت نن اوار مسُن، اوکان گُڈّ او گشت کن پیشتما۔ اندا اولی ملاقات آن پد ننا ملاقات تنظیم نا دیوان ئسیٹ مس۔ سنگت آک سفر خان نا جنگی لائخی تے خنار گڑا اودے تنظیم نا ذمہ واری ہم بشخار۔ اودے گشتی کمانڈر کننگ تون اوار اودے جسٹس کمیٹی نا ممبر ئس ہم کریر۔
دا دیوان آن گُڈّ نن اسہ گشت ئسے کن ہم پیشتمان۔ سفر خان ہم تینا لشکر تون اوار گشت ئسے کن روانہ مس۔ داکان پد بھلو وخت ئس ننا ملاقات متو۔ ولدا 2024 ئٹ مشن درہِ بولان آ ننا ملاقات مس۔ ای اودے خناٹ و پاریٹ، ” واہ اڑے قربان، امر اُس؟” گڑا او بشخندہ کرسہ پارے، ” نی کنے اراڑے خنانس قربان انتہ پاسہ کنے؟”
ای پاریٹ، ” ہرا کہ قربانی تا کسر آ ہننگ ءُ ای امو غٹ سنگت آتیکن قربان اُٹ۔”
قربان داڑا مخسہ پارے، ” لوز قربان بھلو معنی ئس تخک، ہر اسٹ دا لوظ نا معیار آ پورو تمنگ کپک۔ دا جُہد ئٹ قربانی امودے ہراڑے بندغ تینا تیوہ ذات یے ایسر کیک، تینا زند ئنا غُٹ مراد آتہ گیرام کیک و ہر وخت جہد ئٹ مریک۔ دُعا کیس ای اندا لوظ قربان آ پورو تمو۔”
گڑا ماسٹر سفر خان کنکہ قربان ئس مس و اینو ہم کنا قربان ءِ۔ اسہ دے ئس ای قربان آن سوج کریٹ، ” نی مدام چُپ اس انتئے؟ ہر وخت چپ تینے ٹی تینٹ گُم مریسہ؟”
قربان پارے کہ” ہرا وخت موت خُڑک بریک گڑا بندغ چُپ مریک۔”
داڑے او بشخندہ کرے۔ گڑا ہمو دے کنا سمجھ ئٹ بس کہ دا بیرہ اسہ جنگی و سیاسی سنگت ئس اف، بلکن او گچینو سوچ و فکر ئسے نا خواجہ ہم ارے۔
منہ دے آن گُڈّ نن مشن درہِ بولان کن رادہ مسُن، ای و سفر خان اوار اَسُن، سفر نا نیامٹ بھاز مسخرہ و شغل کرسہ کرین، ہرا وخت نن مچھ ئنا شار ئنا خڑک سر مسُن، گڑا پارے، ” سنگتاک داسہ شغل و مسخرہ ختم، داسہ ننا تیوہ پام جنگ ئٹ مرے۔”
چھار پنچ دے انداڑے ودار کرین۔ اندا وخت ننا تیوہ ہیت آک جنگ ئکن مسُرہ۔ ہرا وخت نن داکان درہ بولان کن روان مسُن گڑا سفر خان تینا دلیری و حکمت آن دژمن ئے بےسوب کننگ کن مثال ئس تخا، دا سفر نہ بیرہ جنگ ئنا بشخ ئس بلکن دا راج ئکن اسہ امیت نا کرن ئس ہم ئسک۔
قربان ننے پارے کہ اگہ کسر ئٹ جاگہ ئس دژمن تون مقابلہ مس، گڑا اِرا سنگت جنگ کیرے و ایلو سنگت آک پیشتمسہ مشن درہ بولان ئٹی دژمن تون جنگ کیرے۔
قربان پارے،” سنگت آک انت نمے دا فیصلہ منظور ءِ؟ اگہ اف گُڑا نم تینا رائے ئےطدرشان کبو۔ "
نن ورندی تسُن, ” جی نہ قربان، ننے منظور ءِ۔”
ہرا تم نن ہنیسہ ہنیسہ تینا مزل آ سر مسُن گڑا قربان پارے، ننے ودار کروئی ءِ تانکہ مجید برگیڈ تینا مشن ئے بناءِ کتنہ۔ ہراتم او تینا مشن ئے بناء کرے، گڑا نن داکان پنجابی فوج ئے اسٹ اسٹ کرسہ خلنگ برجاہ کینہ و اندُنو جنگ ئس کینہ کہ اونا گمان ہم اوڑے سر مف۔ ننا مسخت سرسوب مروئی ءِ، و دا ننا یخین و ایمان ءِ کہ نن سرسوب مرینہ۔ انشاء اللہ مُچا جنگ و گیابان ننا کنٹرول ئٹی مریک۔ "
اندا نیامٹ مچھ ایف سی کینٹ ئنا مُون آ اسہ ترند ءُ تراک ئس مس۔ فدائی فاروق تینا سنگت آتہ کینٹ ئنا تہٹی پترینگنگ نا کسر کن بارود آن پُرو گاڑی ئس کینٹ آ خلک و مشن درہِ بولان نا بناء ئے کرے۔
اندا تراک آن پد ایلو سنگت آک کینٹ نا تہیا پُترینگار و جنگ بناء کیریر۔ او سم تا توار تیوہ مچھ شار ئے چارمہ کُنڈ آن پلویڈ ئٹ ہلک و تیوہ مچھ شار ئے لڑزہ ئس ارفے۔
ننا ایلو سنگت آک دژمن آ طوفان آن بار جلہو کریر و دژمن دا اچانک آ جنگ و پوسکنا جنگی حکمت عملی آ بھاز خوفزدہ مس کہ اودے کاٹم نا ڈکننگ کن ہچو جاگہ ئس ہم ملتو، کولپور آن الیس سبی اسکان تیوہ علاقہ بی ایل اے نا جانثار آتا دُو ئٹی اس۔
دژمن نا ہیلی کاپٹرک ہم بسُر کہ تانکہ حالیت ءِ کنٹرول کین، ولے اندا شام کُل گڑاک اونا کنٹرول آن پیشن ئسُر۔
مچا شام جنگ برجاہ مس، سُہب ئنا اسہ سنگت ئس حوال تس کہ اندا فدائی مشن ئٹ چھار فدائی سنگت شہید مسُنو؟
ورندی تس کہ، ” فدائی بالی نادر، فدائی آفتاب، فدائی صدام، و فتع اسکواڈ نا سنگت کاشف۔”
کمانڈر پارے کہ، ” نَدْر پہ شہیداں۔”
ایلو سنگت آک دژمن تون جنگ کرسہ کریر۔ مُسہ دے اسکان مچھ شار و تیوہ علاقہ بی ایل اے نا کنٹرول ئٹ مس۔ اندا مشن ئٹ گیشتر سنگت آک، یعنی فدائی عطا، فدائی جمال، فدائی قاسم، فدائی سلال، فدائی نظام، فدائی حافظ زیشان، فدائی حمل مومن و فدائی عبدالودود ساتکزی ڈیہہ کن نَدر مسُر۔
ولدا مرکز آن کلہو بس کہ مشن درہ بولان سرسُوبی ئٹ سرجم مسُنے۔ ” داسہ نم واپسی نا تینا تیاری ئے کبو، انتئے کہ ننا مسخت سر سُوبی ئٹ پورو مسنے۔ "
مرکز نا کلہو ئٹ پاننگا، ” کہ داخس کم وسائل نا باوجود مُسہ دے اسکان تیوہ مچھ شار و کولپور آن الیس سبی اسکان شار تے تیوہ کنٹرول ئٹ کننگ اسہ بھلو کامیابی ئس ء۔ دژمن تو تیوہ جنگی وسائل آک اریر، ولے او نما جوزہ، ہمت، دلیری و جنگی حکمت عملی نا مون آ بیوس مس۔ نم اسہ نظریہ ئسے تون تینا دتر نا ایسری پڑی اسکان جنگ کرسہ کریرے، الے دژمن نا تنخوہ خور ہنگا سپائی تینا ایمان و حوصلہ ایسر کرینے۔”
مرکز نا فیصلہ آن پد نن سنگت آک کمانڈر تون اوار اوکان پیشتمان۔ یخ انگا شام آ پند کرسہ اسہ جگہ ئسے آ سر مسُن گڑا قربان پارے، "مچٹس دم کشنہ۔”
نن زونڈان، کمانڈر پارے،” سنگتاک، نمے آن اسہ سوال ئس ء؟”
نن ورندی تسُن، "جی ہئو سوج کے۔”
کمانڈر پارے، نن دا مشن آ تینا شہید آ سنگت آتے النگُ ان ہننگُن، امو سنگت آک ہرا بلوچ ڈیہہ و آجوئی نا فکر کن قربان مسُنو۔ دا سنگت آتا جسمانی جتائی آ نما انت حال ءِ؟”
نن بس اندا سوچھانہ کہ سنگت آک داخسو بھلو قربانی ئس تسُر و سرسوب مسُر۔ ولے غٹ سنگت آک چپ ئسُر و وداری ئسُر کہ قربان تینٹ دا ردئٹ انت پائک۔
مچے چپی آن پد سنگت تینٹ ہیت ئے بناء کرے:
سنگتاک ! یار آک تینا فرض ئے پورو کرینو، ولے داسہ دا ذمواری ننا کوپہ تیٹی بسنے کہ نن اندا فکر و راجی مسخت ئے مزل اسکان سر کین۔ دا قربانی تا قیمت ئے ننے اِرا وڑ ئٹ تروئی تمک، اول ننا آجوئی، ایلو اندا آجوئی کن تینا کاٹُم تے قربان کننگ۔ نن تینا سنگت آ تا مسخت ئے ارفسہ مُستی کانہ، اراڑسکان ننے تینا مزل دوئی مرے۔ ننا مزل آجوئی یا کہ مرگ ءِ شہادت ءِ۔
داکان پد نن آرام کرین و وا تینا سفر ئے برجا کرین، زرس اُرے آن پد نن تینا اوتاک آ سر مسُن۔ دا اوتاک آ نن قربان تو بھلو وخت ئس تدیفین۔ اسہ دے ئس قربان کنے پارے، ” کہ ای داسہ کاوہ، اگہ زندگی مس تو پدا ملاقات مریک۔”
کنا قربان کنے رُخصت کرے و پیشتما۔ منہ دے آن پد نن اوتاخ ئٹ تولوک اسُن کہ سنگت ئس نیٹورک آن بس۔ نن اودے حوال کرین، گڑا سنگت بھاز خوش ئس کہ، ” سنگتاک موارک مرے نمے۔”
ای سوچ کریٹ، انت مسُنے؟
پارے، ” قربان نا لشکر اسکلکو ئٹی فوج ئنا اسہ کیمپ ئسے آ گچینو جلہو ئس کرینے، تیوہ شام جنگ برجاء مسنے، دژمن نا پوسٹ آ سنگت آک کوزہ کرینو و سوب اسکان انتظار کرینو دژمن کن گڑا سُوب ئنا او نا جہاز آک بسنو و ماسٹر سفر خان ہیلی تیا مارٹر ئٹ جلہو کرینے و دژمن بےسوب مسنے او سنگتاک دژمن نا مڈی تے مچ کرینو و سرسوبی ئٹ تینا سنگر تیا سر مسنو۔”
"دا گپ ئے بنیسہ کنا باہ آن توار ئس پیشتما ،کہ واہ اڑے قربان، کنا قربان، ماسٹر قربان۔ "
داکان گُڈّ کنا ملاقات قربان تون،” شور و پارود ئٹ مس "ارا تم کہ نن سنگت تون اوار شور و پارود ئٹ سر مسُن گڑا اسہ سنگت ئس سوج کرے، ” کہ سنگت ماسٹر سفر خان ئے خنانُس؟”
ای پاریٹ، "نہ یار۔”
گڑا او پارے قربان انداڑے کے۔ ای دا ہیت ئے بنگٹ اسل بھاز خوش مسُٹ، منہ ساہت آن پد قربان بس، مخسہ پارے، ” نی کنا رندہ ہچبر یلہ کپیسہ۔”
ای ہم مخیسہ پاریٹ، شہادت اسکان یلہ کپرہ تہ۔
قربان پارے، ” اُست ئٹی کپیس شُغل کننگ اُٹ۔” پدا پارے، ” مزاق ئے یلہ کہ دا پار کہ ہیروف ئٹی انت ایل کرینس نی۔”
ای پاریٹ، ” بھاز گڑا ایل کرین ولے ہرا گڑا ئے اسُل بھاز ایل کرین او سنگت آتا قربانی نا سبخ اس۔ اندا سبخ کہ ننے تیوہ مخلصی، خواری و اُست خواہی تون اوار دژمن آ بلا ہنگا جلہو کن پورو بند و بست کروئی تمک۔ "
داکان پد نن مشن ءِ ہیروف نا شہید آتے یات کرین و اوفتیا ہیت کرسہ کرین۔ نن طالب و خالد، آصف و طیب، رضوان و چیف کامی، شاویز و میرک و ماہلو ئے یات کرسہ کرین۔ فتح اسکواڈ نا سنگت شفقت عرف دیار آ ہم ہیت مس۔ آخر آ قربان پارے، ” داسا ننے اندا سو چوئی ءِ کہ دژمن ئے اراڑے و امر خلوئی ءِ۔ ننے اندا جہد تون اوار مخلص و ایماندار مروئی ءِ، او ہر وخت راستی و وفاداری ئٹ مروئی ءِ۔”
دا اوڑدئی آن گڈ نن سفر کن رادہ مسُن۔
اسہ دے ئس مَش ئسیٹی نیٹرورک آ سنگت ئسے تون حال حوال مس۔ سنگت پارے کہ "سنگت نوشکی شار ئٹ سنگت آک فوج آ جلہو ئس کریر گڑا اندا جلہو ئٹی سنگت عدنان شہید مس و سنگت سفر خان، نا قربان ٹپی مَسنے۔”
پین گیشتر حوال رسینگا کہ سنگت سفر خان ٹپی حالیت ئٹ بھاز دتر وہنگ نا سوب آن شہید مسُنے۔
دا حوال ئے بسنہ کنا اُست، روح و بدن نا ہر کُنڈ آن اندا توار بس: ” قربان رُخصت اف اوار اُن سنگت۔”
