کیچ ئنا تحصیل تمپ دازن آن تعلقداری تخوک ورنا سہیل عبداللہ نا ایڑ تربت پریس کلب ئٹ پریس کانفرنس کرِسہ پارے کہ سہیل ئے 11 اکتوبر آ بہمن آن بیگواہ کننگانے و پنچ تو گدرینگ آن پدا ہم دائسکان اونا ہچ حوال رسینگتنے۔ خاہوت اونا آجوئی کن چرجوئی ئٹ توار بڑز کننگ ءِ ولے دائسکان ہچو گھامگیج متنے۔
او پارے کہ سہیل عبداللہ اسہ نفسیاتی مریض ئس ءِ و اونا باقاعدہ علاج مننگ اسک۔ وہ داکان مست ہم زورانسری بیگواہی تا گواچی مسس۔ اودے 2022 ئٹ تمپ دازن آن بیگواہ کننگ آن تو ئس پد آجو کننگاسس۔ او وخت ہم اوڑا بھاز جسمانی و ذہنی بیدادی کننگاسس۔
اونا پاننگ اس کہ سہیل عبداللہ ئے گوادر آن تربت آ سفر نا وخت اسہ حادثہ ئس مسس ہراٹی او ٹرک آن تماسس و اونا دو و نک پیناسُر۔ دا تدینی آن پد او بھاز ٹپی حالیت ئٹی اسک و علاج نا آہری اس۔
اونا ایڑ پارے کہ دا تدینی آن پد سہیل ئے اونا سیال آک بہمن آ دریر تاکہ اونا مناسب علاج مرے۔ ولے 11 اکتوبر 2024 آ اودے اوکان زورانسری بیگواہ کننگا۔
او ودیک پارے کہ سہیل تون اوار بہمن آن چھار ورنا تہ بیگواہ کننگا۔ ہرافتہ چھار تو آن پد آجو کننگا ولے سہیل عبداللہ نا دائسکان ہچ حوال اف۔ دا غیر یخینی صورتحال ئٹ خاہوت صدمہ نا گواچی ءِ۔
او پارے کہ سہیل نا باوہ تینا مار ئنا بیگواہی نا ڈکھ ئٹ ذہنی دباؤ ٹی اسک و اسہ تو ئس مُست کذیت کرے۔ او تینا مار ئنا آجوئی نا اومیت ئٹ دے و نن گنار کننگ اسک ولے ننے انصاف رسنگتو و اندا ازیت اودے درے۔
سہیل عبداللہ نا خاہوت بندغی حق آتا ادارہ، سول سوسائٹی و اقوام متحدہ آن خواست کرے کہ اونا اجوئی ٹی تینا کڑد ئے سر تیر۔ اونا پاننگ اسک کہ اسہ نفسیاتی مریض و جسمانی وڑ ئٹ نزورو ورنا ئس ءِ اودے دا وڑ بیگواہ کننگ بندغی حق آتا لتاڑ ءِ۔
سہیل بلوچ نا ایڑ ایسر ئٹ پارے کہ نن سہیل نا زند ئنا بابت ئٹ بھاز فریشان اُن انتئے کہ او نارمل بندغ ئس اف، بھاز ناجوڑ ءِ و اگہ اودے پین بیگواہ تخنگا گڑا ننے اونا صحت نا بابت ئٹ بھاز فریشانی مرو۔
