بلوچ نیشنل موومنٹ (بی این ایم) نا ڈنّی شعبہ نا زمہ وار نیاز بلوچ جہانی حالت نا بدلی تا تنظیم نا باسک آتا دیوان ئٹی پارے کہ ساڑی آ حالت آک ترندی ئٹ بدل مننگ ئٹی ءُ، بلوچ راج ئے دادے سرپند مروئی ءِ۔ امریکہ ٹی حکومت نا بدلی تون اونا پیشن نا ڈٹ بندیک ہم بدل مسنو ہرافتان تیبہ دنیا زیمی مرو۔ امریکہ داسا ہر ڈیہہ ئتو تینا تعلق ئے گھنڈنگ گچین کننگ ئٹی ءِ و ایلوفتا مسئلہ آتان تینے مُر توننگ نا کوشست ئٹی ءِ۔ ہمرکہ یوکرین نا معاملہ ٹی امریکہ روس ئتو ہیت و گپ کننگ ئٹی ءِ۔ ہراٹی یورپ نا ڈیہہ تا و یوکرین نا تینا منشا اف۔
اونا پاننگ اس کہ امریکہ کن اونا کاروباری معاملہ اولیکو اہمیت ئے تخک و اونا مقابلہ ٹی چین ءِ ہرادے او توننگ خواہک۔ ننا خطہ ٹی سی پیک و چین ئنا عرب ڈیہہ تا زیم آک چیلنج جوڑ مسنو ہندن روس ہم اسہ بھلو تاغت ئسے ہرادے نظر انداز کننگ مننگ کپک۔ جہانی تاغت آک دنیا نا معاملہ آتہ بدل کننگ نا وس تخرہ بروکا وخت اوفتا مفاد آتون گھنڈوک ءُ۔ چین گوادر ئٹی ‘نیول بیس’ ئس جوڑنگ خواہک ہراڑان دے کہی تاغت آک خْوش افس۔
نیاز بلوچ نا پاننگ اس کہ پیشن رہینگوکا بلوچ آک سیاسی کاریم تیٹ گیشتر بشخ ہلیر و عرب ڈیہہ تیٹ پاکستان کن است خواہی و کمک ئے توننگ نا کوشست کیر۔ پاکستان بندغی حق آتا لتاڑ نا سوَب آن دنیا ٹی اسہ جْوانو ڈیہہ ئس گوندنگپک۔ ننے دا باور کرفوئی ءِ کہ آزات بلوچستان خطہ ٹی ایمنی ہتوکو ڈیہہ ئس مرو۔
اونا ودیک پاننگ اس کہ پاکستان نا تہہ ئنا چِھک ئہ تاڑ آن ہم زیات زیمی مسنے اونا غُٹ سیمسرک رکھوک افس۔ گلگت بلتستان، کشمیر دا کچ اسکا کہ پنجاپ نا تہہ آن ہم پاکستانی فوج آن بیزاری پھاش مننگ ئٹی ءِ۔ پاکستان غُٹ جہانی بینک آتا وامدار ءِ۔ پاکستان تون اسہ بھلو ڈیہہ ئسے نا کمپنی سے نا کچ ہم مڈی سلتنے۔ بلوچستان نا مال و مڈی تیان بیرہ پنجاپ ئے چلفنگ نا کوشست مننگ ئٹی ءِ۔ پاکستان ئٹی اقتدار نا بنجاہ پنّانے و بلوچستان آ پاکستان بیرہ تینا فوج ئنا وسپہ ئٹ کوزہ کرینے۔
دا دیوان بی این ایم نا ادارہ، خواننگ و ہیلکاری (کیپسٹی بلڈنگ کونسل) نا کُنڈ آن اڈ تننگا ہرانا زمہ واری تہ بی این ایم نا کیچ-گوادر ہنکین پورو کریر۔
