بلوچستان لبریشن فرنٹ نا ترجمان میجر گہرام بلوچ تینا شنگ کروک بیان ئٹی پارینے کہ 23 فروری 2025 آ بی ایل ایف نا سرمچارک اندھرو حوال ئس رسینگ آ سلام بیک واشک ئٹی ریاستی مخ تف سلاہ بند ٹولی (ڈیتھ سکواڈ) نا کارندہ میر ایوب عالم ملازئی آ جلہو کرسہ اودے کھسفیر و اونا سِلاہ تہ دوئی مسر۔
اونا پاننگ اس کہ ایوب ملازئی کیہی سال آن ریاست کن کاریم کریکہ و وطن دوست آ بلوچ آتا بیگواہی تیٹی ہم اونا دُو اس۔
گہرام بلوچ نا پاننگ اس کہ ایوب ملازئی بھلو وخت ئسے آن ڈیتھ سکواڈ نا شاہد ملازئی پنیئو کارندہ ئسے تون اوار تمسہ علاقہ ٹی بلوچ دشمن ریاستی لشکر کشی تا ڈٹ بندی و کاریم تیٹ تُد اس۔ او علاقہ ٹی ریاستی لشکر نا سِلاہ بند آ کاریم تا بھلنی ئے کریکہ و بلوچ سرمچار تا برخلاف کاریم کننگ کن علاقہ نا شرفدار آ بندغ آتا زوراکی کریکہ۔
ترجمان پارے کہ شاہد ملازئی و ایوب ملازئی نا نیام ئٹی اختلاف آن پد ریاستی ادارہ غاک ایوب ملازئی ئے بلوچ جہد ئنا برخلاف تینا جتا سِلاہ بندو لشکر ئس جوڑنگ نا زمہ واری تسر، اونا بھلنی ٹی دا لشکر خاران و واشک تون اوار ہیب ئہ کھیب ئنا علاقہ غا تیٹ تالان مننگ ئٹی اس۔ بی ایل ایف نا اوڑا بھلو وخت ئسے آن نظر اس و اودے خلنگ آن مہالو دا خیال تخنگا کہ جلہو ئٹی چنا نیاڑی تون اوار پین کس ئے نسخان رسینگپ۔
میجر گہرام بلوچ پارے کہ بی ایل ایف بلوچ اُلس آن خواست کیک کہ ایوب ملازئی آن بارنگا بلوچ دشمن آتا کاریم ئٹی بننگ نا جہہ آ دافتا پیدواری ٹی سرمچار تہ کمک کبو و بلوچ چاگڑد ئٹی راجی غدار، نشہ بہا کروک، دُز و زمین کوزہ کروکا تہ چھٹفنگ ئٹی تینا راجی زمہ واری ئے پورو کبو۔
