بلوچستان لبریشن فرنٹ نا ترجمان میجر گہرام بلوچ تینا شنگ کروک بیان ئٹی پارینے کہ 21 فروری 2025 آ تنظیمی سنگت سرمچار سخی بخش عرف قندیل و بالاچ عرف اسلم تیرتیج آواران ئٹی تنظیمی سفر نا وختا پاکستانی لشکر و اونا جہی آ سلاہ بند لشکر ڈیتھ اسکواڈ تون جھڑپ ئٹی شہید مسر۔
اونا پاننگ اس کہ تیرتیج آواران نا جہی شہید سخی بخش عرف قندیل بلوچ ولد علی بخش 2023 ئٹی بلوچستان لبریشن فرنٹ نا بشخ مسّس و بلوچستان نا بھاز آ جہہ تیا جنگ ئٹی گچین وڑئٹ اوار اس۔
او پارے کہ سخی بلوچ بلوچی زبان نا ورناوُ شائر و نوشتہ کارس ئس۔ او تینا شاعری و نوشت آتیٹ شہید آتہ و وطن نا زیبائی ئے گچینی ئٹ درشان کریکہ۔
میجر گہرام بلوچ نا پاننگ اس کہ شہید بالاچ عرف اسلم ولد علی بخش ہند گریشہ خضدار 2024 ئٹی بی ایل ایف نا کاروان نا بشخ مس و آواران و کولواہ ٹی بھاز آ جنگ آتیٹ اوار اس۔ شہید بالاچ اسہ خوانندہ ئس اسک ولے راجی آجوئی نا فلسفہ ئے فکری وڑئٹ پہہ مننگ آن پد سِلاہ بند جہد ئٹی اوار تما۔
اونا ودیک پاننگ اس کہ تومکا سرمچارک تیرتیج آواران ئٹی پاکستانی لشکر نا جہی آ لشکر تون جھڑپ ئٹی شہید مسر۔ دا لشکر ہرا اورنگزیب بزنجو نا بھلنی ٹی بلوچ زنک ایسری نا کاریم ئے کننگ ئٹی ء۔ سرمچار آتا و ریاست نا جہی آ کارندہ غاتا نیام ئٹی مروکا دا جنگ ئٹی ریاستی کارندہ شبیر (بیدی والا) تون اوار بھاز آ کارندہ آک ٹھپی مسر، ہندن جہی آ ریاستی لشکر ئے دشمن فوج ئنا کمک دوئی اس۔
ترجمان نا پاننگ اس کہ بی ایل ایف آواران و کولواہ نا غیرتی آ مخلوق ئے پُہہ کیک کہ اورنگزیب و اونا غٹ بندغ آتان تعلق ئے پرغبو، ہرافتا بلوچ زنک ایسری ٹی دُو ارے۔ بی ایل ایف سنگت سرمچار تہ اوفتا شہیدی آ دروت ندر کیک و اوفتا ارمان آزات بلوچستان اسکان جنگ ئے برجا تخو۔
